Salmos 146

1¡Yupaychasqa Señor Diosqa kachun! Tukuy sonqon Señor Diosta yupaychasaq. 2Kawsashanaykamaqa Señor Diostan yupaychasaq, kawsashanaykamaqa Señor Diosmanmi takisaq. 3Ama kamachikuqkunamanqa k'askakuychischu, ama runallamanqa hap'ipakuychischu, manan payqa qespichiyta atinchu. 4Wañukapuspanqa hallp'amanmi tukupun, chay p'unchaypachan yuyaykusqankunaqa chinkapun. 5Kusisamiyoqmi Jacobpa Diosninpa yanapaykusqan runaqa, kusisamiyoqmi Diosnin Señor Diospi suyakuq runaqa. 6Señor Diosmi kamarqan hanaq pachatapas, kay pachatapas, lamar-qochatapas, chaykunapi tukuy imaymana kaqtapas. Payqa wiñaypaqmi hunt'ashallanpuni. 7Sarunchasqakunapaqmi chaninchapun, yarqasqakunamanmi mikhuchin. Señor Diosmi watasqakunata kacharichin. 8Señor Diosmi ñawsakunaq ñawinta qhawarichin, Señor Diosmi k'umuykachisqakunata sayarichin, Señor Diosmi chanin runakunata munakun. 9Señor Diosmi wak llaqta runakunata waqaychan, mana piniyoqtapas viudatapas uywan, millay runakunaq ñannintan ichaqa waqllichin. 10Señor Diosqa wiñaypaqmi kamachikunqa. Sión llaqtalláy, Diosniykiqa wiñay-wiñaypaqmi kamachikunqa. ¡Yupaychasqa Señor Diosqa kachun!

will be added

X\