Salmos 145

1Diosníy, Reyníy hatunchasqaykin, wiñay-wiñaypaqmi sutiykita saminchasaq. 2Sapa p'unchaymi saminchasqayki, wiñay-wiñaypaqmi sutiykita yupaychasaq. 3Hatunmi Señor Diosqa, payqa ancha hatunmi, yupaychanapaq hinapunin, hatun-kayninmanpas yuyayqa manan aypanchu. 4Sapanka miraypas wawankumanmi ruwasqaykikunata mentanqaku, atiywan ruwasqaykikunatan willanqaku. 5Ancha sumaq qhapaq-atiyniykimantan rimanqaku, ñoqataq musphana ruwasqaykikunamanta rimasaq. 6Manchana atiywan ruwasqaykikunamantan rimanqaku, ñoqataq hatun-kayniykimanta willakusaq. 7Sumaq sonqollaña kasqaykita willakuspan rimanqaku, chaninchayniykitan kusisqa takinqaku. 8Señor Diosqa sumaq sonqon, khuyapayakuqmi, mana usqhay phiñakuqmi, ancha munakuqmi. 9Allinmi Señor Diosqa llapapaq, khuyapayaspan llapa ruwasqanta qhawashan. 10Señor Diosníy, llapa ruwasqaykikunan yupaychasunkiku, qan sonqo runakunan saminchasunkiku. 11Kamachikusqaykiq qhapaq-atiyninmantan rimanqaku, atiyniykitan willakunqaku, 12atiywan ruwasqaykikunata llapa runa yachanankupaq, kamachikusqaykiq ancha sumaq qhapaq-atiynintapas yachanankupaq. 13Kamachikusqaykiqa wiñay-wiñaypaq kamachikuymi, munaychakusqaykiqa wiñay-wiñaypaqmi. Señor Diosqa llapa prometekusqankunatan hunt'an, tukuy ruwasqantapas munakuywanmi qhawarin. 14Señor Diosqa llapa urmaqkunatan aysarin, llapa k'umuykachisqakunatan sayarichin. 15Llapan suyakusunkiku, qantaqmi tiemponpipuni paykunaman mikhuchinki. 16Makiykita kicharispan llapa kawsaqkunata munasqankuwan saksaykachinki. 17Señor Diosqa maychus chanin kaqtapunin ruwan, tukuy ruwayninpipas sumaq sonqon. 18Señor Diosqa llapa waqyakuqninkunaq sispallanpin kashan, hayk'an cheqaq sonqowan waqyakuqninkunaq qayllallanpin kashan. 19Manchakuqninkunaq munasqantan hunt'an, waqyakusqankutan uyarin, paykunatan qespichin. 20Señor Diosqa llapa munakuqninkunatan waqaychan, llapa millay runakunatan ichaqa chinkachin. 21Simiywanmi Señor Diosta yupaychasaq. Tukuy runa ch'uya sutinta yupaychachun kunanpas wiñaykamapas.

will be added

X\