Salmos 144

1¡Saminchasqa waqaychawaqniy Señor Diosqa kachun! Paymi maqanakunaypaq yachachiwan, paymi awqa-tinkuypaqpas wakichiwan. 2Paymi munakuwaqniypas pukaraypas, paymi pakakunaypas qespichiwaqniypas, paymi escudoypas hark'aykuwaqniypas. Paymi llaqtakunawan kasuchiwan. 3Señor Diosníy, ¿imataq runari payta yuyarinaykipaq? ¿Imataq wañuq runari qhawarinaykipaq? 4Runaqa huk samay hinallan, kawsayninqa chinkapuq llanthu hinallan. 5Señor Diosníy, hanaq pachata kicharimuspa uraykamuy, orqokunata q'osñinanpaq llamiykuy. 6Lliphllikichimuy, awqaykikunata qatiriy, wach'iykikunata wach'imuy, paykunata llaksay. 7Hanaq pachamanta makiykita haywarimuway, askha unumanta horqospa aysaway, wak llaqtayoqkunaq makinmanta qespichiway. 8Siminkuqa llullatan riman, llullakuspan juramentotapas ruwanku. 9Diosníy, mosoq takitan takipusqayki, arpawanmi takipusqayki. 10Qanmi reykunata atipachinki, kamachiyki Davidtapas qespichinki, 11chayrayku, awqa sonqo runakunamanta kacharichiway, wak llaqtayoqkunaq makinmanta qespichichiway. Siminkuqa llullatan riman, llullakuspan juramentotapas ruwanku. 12Wayna churinchisqa huertapi t'ikashaq mallkikuna hina kachun, sipas ususinchisqa palaciota sumaqchaq thupasqa tusakuna hina kachun. 13Taqenchisqa imaymana ruruwan hunt'a kachun. Ovejanchisqa waranqanpi mirachun, hallp'anchispi waranqa-waranqa mirachun. 14Toronchisqa kallpasapallaña kachun, awqanchiskunaqa llaqta perqata ama q'asachunchu, runanchisqa ama kamachi-kayman lloqsichunchu, ama plazanchispi llakisqa qapariypas uyarikuchunchu. 15¡Kusisamiyoqmi chay hinata q'ochukuq llaqtaqa! ¡Kusisamiyoqmi Señor Diosniyoq llaqtaqa!

will be added

X\