Salmos 143

1Señor Diosníy, mañakusqayta uyariykuway, khuyapayawaspayki mañakamusqayta uyariykuway. Qanqa chaninmi hunt'aqmi kanki. ¡Kutichimuway! 2Ama kamachiykita huchachawaychu, manan qayllaykipiqa mayqen runapas chaninchakunchu. 3Awqaykunan qatiykachawanku, pampakaman ñit'iykuwanku, unayña wañusqakunata hinan laqhayaqpi tiyachiwanku. 4Sinchitapunin llaki ñit'ishawan, sonqoymi p'iti-p'itishan. 5Ñawpa p'unchaykunatan yuyarini, tukuy ruwasqaykikunatan yuyaymanani, makiykiq ruwasqankunatan qhawarini. 6Ch'aki hallp'a hinan qanmanta ch'akichikuni, mañakuspaymi makiyta mast'arimuyki. 7Señor Diosníy, uyariykamullawayña, wañunayashaniñan. Ama uyaykita pakaykuwaychu, paqtan p'ampanapaq ayakuna hina kapuyman. 8Tutallamanta munakuyniykita reparachiway, qanman hap'ipakamusqayrayku. Maynintachus purinayta yachachiway, tukuy sonqo asuykamusqayrayku. 9Señor Diosníy, qanmi pakaykuqniy kanki, awqaykunamanta qespichiway. 10Qanmi Diosniyqa kanki, chayrayku, munayniyki ruwayta yachachiway, allin Espirituyki sumaq ñanninta pusawachun. 11Señor Diosníy, sutiyki yupaychasqa kananpaq kawsachiway, qanqa chaninmi kanki, llaki-phutiymanta horqoway. 12Munakuwasqaykirayku, awqaykunata wañuchiy. Ñoqaqa kamachiykin kani, llapa sarunchaqniykunata chinkachiy.

will be added

X\