1 Kunkayoqtan Señor Diosmanta waqyakuni, kunkayoqtan Señor Diosmanta khuyapayakuyninta mañakuni. 2 Paymanmi llakipakuyniyta rimarini, paymanmi llaki-phutiyniyta willakuni. 3 Sinchi llakiq ñit'isqan kashaqtiymi qanqa imayna purinayta yachanki. Purinay ñanpin toqllata pakawarqanku. 4 Pañaman kutirispaymi qhawarini, manataq pipas yanapaykuwananpaq kanchu, manan pipas hark'aykuwananpaq kanchu, manan pipas yuyarikuwananpaq kanchu. 5 Señor Diosníy, qanmanmi waqyakamuyki, qantan niyki: Waqaychawaqniymi kanki, qanllan kay kawsaypiqa ima hayk'aypas kanki, nispa. 6 Waqyakamusqayta uyariykuway, may llakisqapunin kashani. Qatiykachawaqniykunamanta qespichiway, ñoqamantaqa aswan kallpayoqmi kanku. 7 Llakiq-ñit'isqan kasqaymanta horqoykuway qanta yupaychanaypaq. Hinan sumaqta rikuwaqtiyki chanin runakuna saminchaspa muyuykuwanqaku.
