Salmos 141

1Señor Diosníy, qantan waqyakamuyki, usqhaylla hamuy, qanta waqyakamuqtiy uyariykamuway. 2Mañakamusqay ñawpaqeykiman incienso q'apay hina wicharimuchun, makiyta mast'arimusqaypas tardeyaykuy sacrificio hina kachun. 3Señor Diosníy, simiy qhawaqta churay, simiyta waqaychaway. 4Ama munaychu millaykaqwan sonqoyta suwachikunayta, ama munaychu millay runakunawan ruwaysikuq kanayta, ama hayk'aqpas aycha kusichiyninkupi kasaqchu. 5Allinniypaqmi chanin runaq wanachiwayninqa, sumaq q'apaytaqmi anyaykuwayninpas, chaykunataqa munallasaqpunin. Chaypas millaykunaq ruwasqan contraqa mañakushallasaqpunin. 6Paykunaq kamachiqninkuna qaqapaqtinmi, rimasqaykunaqa cheqaq kasqanta yachanqaku. 7Ninqakun: Tulluykuqa aya p'ampana patapin t'akasqa kashan, imaynan k'ullu chhillpaqa pampapi wikch'u-wikch'u kashan hina, nispa. 8Chaymi, Apu Señor Diosníy, qhawamushayki, qanmanmi hap'ipakamuyki, ama saqerpariwaychu. 9Llika mast'asqankumanta waqaychaykuway, millay runakunaq toqlla churasqankumanta hark'aykuway. 10Millay runakunaqa llikallankumantaq urmaykuchunku, chaykamataq ñoqaqa mana imanasqalla pasarqosaq.

will be added

X\