1 Señor Diosníy, millay runamanta qespichiway, maqakuq runakunamanta waqaychaway. 2 Paykunaqa sonqonkupin millaykunata yuyaykunku, ch'aqwatapas sapa p'unchaymi hatarichinku. 3 Mach'aqwaypa qallun hinan qallunkupas ñawch'illaña, víboraq venenon hinan rimasqankupas. 4 Señor Diosníy, millaykunaq munaychakuwananmanta waqaychaykuway, maqakuq runakunamanta amachaykuway, urmanaypaq yuyaykuqkunamanta hark'aykuway. 5 Chay anchaykachaqkunan toqllata pakapi churawarqanku, ñanniypin llikata, waskhata mast'awarqanku, purinaypin toqllakunata churawarqanku. 6 Señorníy, qantan niyki: Qanmi Diosniy kanki, nispa. Señor Diosníy, waqyakamusqayta uyariykuway. 7 Apu Señor Diosníy, atiyniyoq qespichiqniymi kanki, qanmi awqa-tinkuy p'unchaypi umayta pakaykuwarqanki. 8 Señor Diosníy, ama millay runaman munasqankunata qoychu, ama yuyaykusqankuna hunt'akunanta munaychu, paqtan umata hoqarinkuman. 9 Llullakuspa millayta rimakuwasqanku paykunaman kutichun. 10 Nina sansakuna paykunaman urmaykuchun, unuyoq ukhu-ukhu p'uytuman wikch'uykuy, amaña chaymanta lloqsimuchunkuñachu. 11 Yanqa tumpakuq runaqa ama kay suyupi takyachunchu, maqakuq runataqa mana allin hap'ichun, maqashaspalla wañuchichun. 12 Señor Diosníy, ñoqaqa yachanin wakchapaq chaninchapusqaykita, llakisqa runamanta sayarikusqaykitapas. 13 Chanin runakunaqa qantan yupaychasunkiku, chanin sonqoyoqkunaqa qayllaykipin tiyanqaku.
