1 Señor Diosníy, qanmi t'aqwiwankipas reqsiwankipas, 2 qanmi tiyaykusqaytapas sayarisqaytapas yachanki, yuyaykusqaytapas karumantaraqmi sut'itapuni yachanki. 3 Qanmi purinaytapas samarinaytapas yachanki, tukuy ima ruwasqaytapas qhawankin. 4 Manaraq rimarishaqtiymi, Señor Diosníy, qanqa llapantaña yachanki. 5 Tukuyneqmantan muyuykuwarqanki, makiykiwantaqmi waqaychawankipas. 6 Chay yachayniykimanqa manan yuyayniy taripanchu, sinchi hatunmi, manan aypayta atinichu. 7 ¿Maymantaq Espirituykimanta risaq? ¿Maymantaq qayllaykimanta ayqesaq? 8 Hanaq pachaman wichasaq chaypas, chaypin qanqa kashanki. Wañuy-pachaman uraykusaq chaypas, chayllapitaqmi qanqa kashanki. 9 Inti lloqsimuyman phalasaq chaypas, inti haykuy lamar-qocha karu patapi tiyasaq chaypas, 10 chaypipas makiykiqa pusawanqan, paña makiykiqa hap'ishallawanqan. 11 Laqhayaqtaña pakaykuway niyman chaypas, laqhayaqqa astawanraqmi k'anchaykuwanqa, 12 laqhayaqpas manan qanpaqqa laqhayaqchu, tutapas p'unchay hinan k'ancharin, k'anchaypas tutapas kaqllan qanpaqqa. 13 Qanmi sonqo ruruyta ruwarqanki, qanmi mamaypa wiksanpi hank'ukunawan minichawarqanki. 14 Ancha musphana ruwasqa kasqaymantan yupaychayki, utirayanapaqmi ruwasqaykikunaqa, allintapunin chaytaqa yachani. 15 Cuerpoypa wiñasqantapas qanqa rikurqankin pakallapi kamasqa kashaqtiypas, hallp'aq sonqonpi sumaq minichasqa kashaqtiypas. 16 Wiksallapiraq kashaqtiymi rikuwarqankiña. Hayk'a watachus kawsanaymi qelqaykipi qelqasqaña karqan, manaraq huk watallapas chayamushaqtin. 17 Diosníy, ñoqapaqqa ancha chaniyoqmi yuyaykusqaykikunaqa, ancha askhallañan chaykunaqa. 18 Chaykunata yupariyta munayman chaypas, aqomantapas aswan askharaqmi kanman. Rikch'arispaypas qanllawanpunin kashani. 19 Diosníy, ¡maytan munayman millay runakunata wañuchinaykita! ¡Maytan munayman runa wañuchiqkuna ñoqamanta karunchakunanta! 20 Paykunaqa millaytan qanmanta rimanku, awqaykikunan yanqapuni sutiykita hoqarinku. 21 Señorníy, ¿manachu cheqnipakuqniykikunataqa cheqnikuyman? ¿Manachu awqaykikunataqa millakuyman? 22 Sinchitapunin paykunataqa cheqnikuni, paykunataqa awqaykunata hinan rikuni. 23 Diosníy, t'aqwiriway, sonqoyta reqsiykuway, allinta probaykuway, yuyaykuyniykunata reqsiykuy. 24 Qhawariway, urmachiq ñanpipaschá purishani, wiñay ñanninta pusakuway.
