1 Señor Diosníy, tukuy sonqon agradecekusqayki, dioskunaq qayllanpin takikunawan yupaychasqayki. 2 Qanqa munakuqmi hunt'aqtaqmi kanki, sutiykitan simi rimarisqaykitan tukuy imaymanamantapas astawanraq hatuncharqanki, chaymi ch'uya wasiykiman qonqoriykukusaq, graciastapas qollasqaykitaq. 3 Waqyakamusqay p'unchaypin uyarimuwarqanki, mana manchakuq qharimanmi tukuchiwarqanki. 4 Prometekusqaykikunata uyarispan teqsimuyuntin reykuna yupaychasunkiku. 5 Señor Diosníy, yuyaykusqaykikunamantan yupaychasunkiku: ¡Ancha hatunmi qhapaq-atiyniykiqa! 6 Qanqa ancha hatunña kanki chaypas, k'umuykukuqtan yuyarikamunki, hatunchakuqtataq karullamantaraq reqsimunki, nispa. 7 Llaki-phutiypi rikukuqtiyqa, qanmi kawsachishawanki. Awqaykuna k'arakta phiñakuqtinkuqa, qanmi paykuna contra sayarispayki kallpaykiwan qespichiwanki. 8 Qanmi yuyaykukusqaykita ñoqapaq hunt'anki. Señor Diosníy, munakuyniykiqa wiñaypaqmi, hunt'allaypuni ruway qallarisqaykitaqa.
