1 Babilonia mayukuna patapin tiyaykurqayku, Sionta yuyarispaykun waqaykurqayku. 2 Chaypi wiñaq saucekunamanmi arpaykuta warkuykurqayku. 3 Chaypin preso apawaqniykuqa takinaykuta munarqanku, muchuchiwaqniykuqa paykunata kusichinaykuta munaspan niwarqanku: ¡Sión llaqta takikunata takiykapuwayku! nispa. 4 ¿Imaynataq Señor Diospa takinkunata wak runakunaq llaqtanpi takiykuman? 5 ¡Jerusalén llaqtalláy, qonqapusqayki chayqa, paña makiy ch'akipuchun! 6 Jerusalén llaqtalláy, manachus yuyarisqayki chayqa, ima kusikuymantapas manachus astawanraq hatunchasqayki chayqa, qalluy upayapuchun. 7 Señor Diosníy, Edom runakuna contra yuyarillaypuni Jerusalén thunikushaqtinmi qaparirqanku: ¡Chayta thuniychis, teqsinkama thuniychis! nispa. 8 ¡Yaw, Babiloniaq ususin, qanqa thunisqapunin kanki! ¡Kusisamiyoqmi mana allinta ruwawasqaykikumanta ayni-kutichipuqniykiqa! 9 ¡Kusisamiyoqmi wawaykikunata hap'ispa qaqaman ch'aqerqariqqa!
