1 Señor Diosta agradecekuychis, payqa allinmi, khuyapayakuyninqa wiñaypaqmi. 2 Dioskunaq Diosninta agradecekuychis, khuyapayakuyninqa wiñaypaqmi. 3 Apukunaq Apunta agradecekuychis, khuyapayakuyninqa wiñaypaqmi. 4 Payllan hatuchachaq musphanakunata ruwan, khuyapayakuyninqa wiñaypaqmi. 5 Paymi yachayninwan hanaq pachata ruwarqan, khuyapayakuyninqa wiñaypaqmi. 6 Paymi unu pataman hallp'ata mast'arirqan, khuyapayakuyninqa wiñaypaqmi. 7 Paymi intita killata ruwarqan, khuyapayakuyninqa wiñaypaqmi. 8 Intitan p'unchay k'anchananpaq ruwarqan, khuyapayakuyninqa wiñaypaqmi. 9 Killatan ch'askakunatan tuta k'anchananpaq ruwarqan, khuyapayakuyninqa wiñaypaqmi. 10 Paymi Egipto suyupi phiwi churikunata wañuchirqan, khuyapayakuyninqa wiñaypaqmi. 11 Paymi Egiptomanta Israel runakunata horqomurqan, khuyapayakuyninqa wiñaypaqmi. 12 Kallpasapa makinta haywarispan horqomurqan, khuyapayakuyninqa wiñaypaqmi. 13 Paymi Puka Lamar-qochata iskayman t'aqarqan, khuyapayakuyninqa wiñaypaqmi. 14 Chay ukhuntan Israel llaqtata chimpachimurqan, khuyapayakuyninqa wiñaypaqmi. 15 Faraontataq soldadonkunatawan Puka Lamar-qochawan millp'uchirqan, khuyapayakuyninqa wiñaypaqmi. 16 Paymi ch'in pampanta llaqtanta pusarqan, khuyapayakuyninqa wiñaypaqmi. 17 Paymi hatun reykunata wañuchirqan, khuyapayakuyninqa wiñaypaqmi. 18 Atiyniyoq reykunatan wañuchirqan, khuyapayakuyninqa wiñaypaqmi. 19 Amor suyu rey Sehontan wañuchirqan, khuyapayakuyninqa wiñaypaqmi. 20 Basán suyu rey Ogtan wañuchirqan, khuyapayakuyninqa wiñaypaqmi. 21 Paymi chay reykunaq hallp'anta llaqtanman herenciata rakirqan, khuyapayakuyninqa wiñaypaqmi. 22 Kamachin Israelmanmi chayta qorqan herencian kapunanpaq, khuyapayakuyninqa wiñaypaqmi. 23 Paymi llakiq ñit'isqan kashaqtinchis yuyarikuwarqanchis, khuyapayakuyninqa wiñaypaqmi. 24 Paymi awqanchiskunamanta kacharichiwarqanchis, khuyapayakuyninqa wiñaypaqmi. 25 Paymi runakunamanpas animalkunamanpas mikhuchin, khuyapayakuyninqa wiñaypaqmi. 26 Hanaq pacha Diosta agradecekuychis, khuyapayakuyninqa wiñaypaqmi.
