Salmos 135

1¡Yupaychasqa Señor Diosqa kachun! Señor Diospa sutinta yupaychaychis. Señor Diospa kamachinkuna, payta yupaychaychis. 2Señor Diospa wasinpi serviqkuna, Diosninchispa wasi pationpi serviqkuna, payta yupaychaychis. 3Señor Diosta yupaychaychis, payqa allinmi, sutinman takikunata takiychis, chayqa sumaqmi. 4Jacobtan Señor Diosqa paypaq akllakurqan, Israeltan kaqnin kananpaq akllakurqan. 5Ñoqaqa yachanin Señor Diosqa hatun kasqanta, llapa dioskunamantapas Señor Diosninchis aswan hatun kasqanta. 6Señor Diosqa ima munasqantan ruwan hanaq pachapipas kay pachapipas, lamar-qochakunapipas ukhunkunapipas. 7Kay pachaq k'uchunmantan phuyukunata wicharichimun, parachimuspan lliphllikichimun, wayraq lloqsimunanmantan wayrachimun. 8Paymi Egipto suyupi phiwi churikunata wañuchirqan, ñawpaq wachay uywakunatapas sipirqan. 9Paymi Egipto suyuman rikhurichimurqan musphana ruwasqa señalkunata, rey Faraón contrapas, llapa oficialnin contrapas. 10Paymi askha suyukunata k'irirqan, atiyniyoq reykunatan wañuchirqan. 11Amor suyu rey Sehontan wañuchirqan, Basán suyu rey Ogtan sipirqan, Canaán suyupi llapa reykunatan wañuchirqan. 12Paykunaq hallp'ankutan herencian kananpaq rakirqan, Israel llaqtanpa kaqnin kapunanpaq. 13Señor Diosníy, sutiykiqa wiñaypaqmi, Señor Diosníy, sapanka miraypin yuyarisqallapuni kanki. 14Señor Diosqa llaqtanpaqmi chaninchapunqa, kamachinkunatan khuyapayanqa. 15Mana iñiyniyoqkunaq idolonkunaqa qolqemantawan qorimantawanmi, runaq ruwasqallanmi. 16Simiyoqmi, manataq rimankuchu, ñawiyoqmi, manataq rikunkuchu, 17ninriyoqmi, manataq uyarinkuchu, manan samarillankupaschu. 18Idolokunata ruwaqkunaqa idolokunapi iñiqkunapas chaykunamanmi rikch'akunku. 19¡Israel runakuna, Señor Diosta saminchaychis! ¡Aarón ayllu, Señor Diosta saminchaychis! 20¡Leví ayllu, Señor Diosta saminchaychis! ¡Señor Diosta manchakuqkuna, payta saminchaychis! 21¡Jerusalenpi tiyaq Señor Diosqa, Sionmantapacha saminchasqa kachun! ¡Yupaychasqa Señor Diosqa kachun!

will be added

X\