Salmos 132

1Señor Diosníy, Davidmanta yuyarikuy, tukuy sasachakuy muchusqankunamanta yuyarikuy. 2Jacobpa Kallpasapa Diosnin, Davidpa prometekusqasuykimanta yuyarikuy, Davidpa jurasqasuykimanta yuyarikuy. Paymi nisqa: 3Manan wasiyta haykusaqchu, manan puñunaypipas puñusaqchu, 4manan puñurillasaqpaschu, manan ch'illmiykullasaqpaschu, 5Señor Diospaq tiyana wasita ruwanaykama, Jacobpa Kallpasapa Diosninpaq wasita sayarichinaykama, nispa. 6Efratapin rimanakuy arcaqa kashan, nisqatan uyarirqayku, Jaar nisqa sach'a-sach'apin chayta tarimurqayku. 7Nirqaykun, ¡Señor Diospa ch'uya tiyananman risunchis! ¡Ñawpaqenpi qonqorikusunchis! nispa. 8Señor Diosníy, atiyniykita rikuchiq arcantin sayariy, samakunaykimantaq hampuy. 9Sacerdoteykikuna chanin-kaywan p'achallikuchunku, qan sonqo runaykikunapas kusisqa qaparichunku. 10Kamachiyki Davidman prometesqaykirayku, akllakusqayki reyta ama qonqarpariychu. 11Cheqaqtapunin Señor Diosqa Davidman jurarqan, chay jurasqantaqa manan yanqayachinqachu. Paymi nirqan: “Huknin churiykitan reyta churasaq”, nispa. 12Churiykikunachus rimanakuyniytapas, paykunaman yachachisaq chay kamachikuyniykunatapas hunt'anqaku chayqa, churinkupas suyupiqa kamachikushallanqakupunin. 13Señor Diosqa Sión orqotan akllakurqan, tiyananpaq chayta munaspan nirqan: 14Sionta munakuspaymi chaypi kamachikusaq, Sionmi wiñaypaq samakunayqa. 15Askha mikhunawanmi saminchasaq, wakcha runankunatan t'antawan saksachisaq. 16Sacerdotenkunatapas qespikuywanmi p'achachisaq, ñoqa sonqo runankunapas kusisqallañan qaparinqaku. 17Chaypin Davidpa atiyninta wakmanta paqarichisaq, akllakusqay reypaqmi lamparata wakichipuniña. 18Awqankunatan p'enqasqata k'umuykachisaq, paypa coronantaqmi sumaqta k'ancharinqa, nispa.

will be added

X\