Salmos 119

1Kusisamiyoqmi ch'uya kawsaypi puriqkunaqa, Señor Diospa yachachisqan simiman hina puriqkunaqa. 2Kusisamiyoqmi kamachikusqan simikunata hunt'aqkunaqa, Señor Diosta tukuy sonqo serviqkunaqa. 3Kusisamiyoqmi Señor Diospa ñanninkunapi puriqkunaqa ima mana chanintapas mana ruwaqkunaqa. 4Qanmi unancharqanki kamachikuyniykikunaqa allin waqaychasqapuni kananpaq. 5Maytan munani qaqa sayayta unanchasqa simiykikunata kasunaypaq. 6Chaypachan mana imamantapas p'enqakusaqchu llapa kamachikuyniykikunata sonqoypi hap'ispa. 7Cheqaq sonqowanmi yupaychasqayki chayasqa chaninchasqaykikunata yachaspa. 8Kamachikusqaykikunatan hunt'asaq. ¡Amapuni saqerpariwaychu! 9¿Imaynatan waynaqa ch'uyata kawsanqa? Simiykiman hina purispanmi ch'uyata kawsanqa. 10Tukuy sonqoywanmi maskhayki, ama munaychu kamachikuyniykikunamanta t'aqakunayta. 11Simiykikunatan sonqoypi waqaychashani, ama qan contra huchallikunaypaq. 12Señor Diosníy, ñoqan saminchayki, unanchasqa simiykikunata yachachiway. 13Simiywanmi willani tukuyta rimarispa chaninchasqaykikunata. 14Kamachikusqaykikunata hunt'aspaymi kusikuni, qhapaqllaña-kaymantapas astawanraqmi q'ochukuni. 15Kamachikuyniykikunapin yuyaymanani, munayniykiman hinan kawsayta munani. 16Unanchasqaykikunawanmi q'ochukuni, manan simiykikunataqa qonqapunichu. 17¡Kay kamachiykita allinta rikuway, kawsanaypaq, simiykitapas kasunaypaq! 18Ñawiyta kichariway, yachachikuyniyki simipi musphanakunata rikunaypaq. 19Ñoqaqa kay pachapi wak llaqtayoqmi kani, ama kamachikuyniykikunata pakaykuwaychu. 20P'unchay-ch'isiyaqmi sonqoy mat'iykushawan, chaninchasqa simiykikunata yachayta munaqtiy. 21Qanmi anchaykachaqkunata phiñarinki, kamachikuyniykikunamanta t'aqakuqkunaqa ñakasqan kanku. 22Paykunan k'amiwanku pisichawanku, chaykunamanta karunchaway, kamachikusqaykikunata kasukusqayrayku. 23Kamachikuqkunaqa hina contrayta rimashachunku, ñoqa kamachiykiqa unanchasqa simiykikunatan yuyaymanasaq. 24Kamachikusqaykikunawanmi kusikuni, chaykunaqa yuyaychawaqniykunan. 25Wañunay patapiñan kashani, prometewasqaykiman hina kawsarichiway. 26Imayna kawsasqaytan willarqayki, qantaq kutichimuwarqanki. ¡Unanchasqa simiykikunata yachachiway! 27Sut'inchasqa simiykikunata reqsichiway, musphana ruwasqaykikunapin yuyaymanasaq. 28Llakiy waqaykunapin heq'epashani, ¡prometewasqaykiman hina allinta kallpachaway! 29Pantachiq ñanmanta karunchaway, sumaq sonqoykiwan yachachikuy simiykiman hina kawsachikuway. 30Hunt'aq runa kaytan yuyaykurqani, chaninchasqa simiykikunatan sonqoypi hap'ikuni. 31Señor Diosníy, kamachikuy simiykikunamanmi k'askakuni, ¡ama p'enqachiwaychu! 32Astawan yuyayniyta paskariwaqtiykin, kamachikuyniykikunata k'uchilla hunt'ani. 33Señor Diosníy, unanchasqa simiykikunata yachachiway, kawsashanaykamaqa hunt'asaqmi. 34Yachachikuy simiykita sut'inchapuway, chayta hunt'anaypaq, tukuy sonqo chayta kasukunaypaq. 35Kamachikuyniykikunaman hina kawsarichiway, chay hinata kawsaspaymi kusikuni. 36Kamachikusqaykikunaman sonqollichiway, mana chaninpi qolqe tariymanqa amataq pusawaychu. 37Hark'aykuway ama yanqa kaqkunata qhawanaypaq, atiyniykiwan kawsarichiway. 38Manchakuqniykikunamanmi prometenki, chayta ñoqa kamachiykipaq hunt'apuway. 39Runaq simin manchakusqayta karunchaway, chaninchayniykikuna allin kasqanrayku. 40Kayqa, sut'inchasqaykikunatan anchatapuni munaykushani, qanqa chaninmi kanki, chayrayku kawsachiway. 41Señor Diosníy, munakuyniykita rikuchiway, prometewasqaykiman hina qespichiway, 42chaypachan k'amiwaqniyman kutichisaq, simiykita hap'ikusqayrayku. 43Cheqaq simillatapuni rimachiway, chaninchayniykikunapi suyakushasqayrayku. 44Yachachikuy simiykitaqa hunt'allasaqpunin, wiñay-wiñaypaq. 45Chaymi mana imanasqalla purisaq, sut'inchasqa simiykikunaman hina kawsashasqayrayku. 46Kamachikuy simiykikunatan reykunaman willasaq, manataqmi p'enqakusaqchu. 47Kamachikuyniykikunan kusichiwan, chaykunatan munakuni. 48Kamachikuyniykikunatan hatunchaspa munakuni, unanchasqa simiykikunapin yuyaymanani. 49Kay kamachiykiman prometewasqayki simita yuyariy, chaypin suyachiwarqanki. 50Prometewasqaykin kawsarichiwan, chaymi llakikuyniypi sonqochawan. 51Uma hoqariqkunan sinchitapuni asipayawanku, chaypas manan yachachikuy simiykimantaqa t'aqakunichu. 52Ñawpa p'unchaykunapi chaninchasqa simiykikunatan yuyarini, Señor Diosníy, chaykunan sonqochawan. 53Yachachikuy simiykita saqepuq millay runakunata qhawarispaymi k'arakta phiñakuni. 54Wak llaqtayoq kasqay kay pachapin unanchasqa simiykikunata takini. 55Señor Diosníy, tutan sutiykita yuyarini, yachachikuy simiykitan yuyani. 56Chay hinatapunin ruwarqani, sut'inchasqa simiykikunata kasukuspa. 57Señor Diosníy, qanmi tukuy imaymanayqa kanki, simiykikunata hunt'anaypaqmi rimariniña. 58Tukuy sonqoywanmi sumaqta qhawariwanaykipaq mañakurqayki, prometewasqaykiman hina khuyapayaway. 59Imaynatachus kawsasqaytan qhawarirqani, kamachikusqayki simikunata kasunaypaqmi kutirirqani. 60Usqhayllan kamachikuyniykikunata hunt'ani, chaykunataqa hunt'anipunin. 61Millay runakunan toqllakunawan muyuykuwanku, chaypas manan yachachikuy simiykitaqa qonqapunichu. 62Chanin kuskachasqaykikunamantan kuska tutata agradecekuq sayarimuni. 63Llapan manchakuqniykikunaq-masinmi kani, sut'inchasqaykikunata hunt'aqkunaq amigonmi kani. 64Señor Diosníy, munakuyniykin kay pachata hunt'aykushan. ¡Unanchasqa simiykikunata yachachiway! 65Señor Diosníy, prometewasqaykita hunt'aspan sumaqta kamachiykita rikuwarqanki. 66Kamachikuyniykikunamanmi k'askakuni, chayrayku allin yuyayniyoq kayta allin reparaq kaytawan yachachiway. 67Manaraq k'umuykachisqa kashaspayqa anchatan pantarqani, kunanmi ichaqa simiykita kasukuni. 68Qanqa allinmi kanki, allintataq ruwankipas, unanchasqa simiykikunata yachachiway. 69Anchaykachaqkunan llullakuspa tumpawanku, ñoqan ichaqa unanchasqaykikunata tukuy sonqo hunt'ani. 70Paykunaqa sinchi k'ankaykachaqmi kanku, ñoqan ichaqa yachachikuy simiykiwan kusikuni. 71Allinniypaqmi k'umuykachisqa kasqayqa karqan, ahinapin unanchasqa simiykikunata yacharqani. 72Ñoqapaqqa yachachikuy simiykikunan aswan allin waranqa-waranqa qorimantapas qolqemantapas. 73Qan kikiykin kamawarqankipas uywawarqankipas, yuyayta qoway kamachikuyniykikunata yachanaypaq. 74Manchakuqniykikunaqa rikuwaspankun kusikunku, simiykipi suyakushasqayrayku. 75Señor Diosníy, yachanin kuskachasqa simiykikunaqa chanin kasqanta, hunt'aq kaspayki llakichiwasqaykitapas. 76Munakuyniyki sonqochawachun, kamachiykiman prometewasqaykiman hina. 77Yachachikuy simiykiwanmi kusikushani, khuyapayaway, chaymi kawsasaq. 78Uma hoqariqkuna p'enqachisqa kachunku yanqapuni tumpawasqankumanta, ñoqataq sut'inchasqa simiykikunapi yuyaymanasaq. 79Manchakuqniykikuna asuykamuwachunku kamachikusqayki simikunata yachanankupaq. 80Unanchasqa simiykikuna allin kasukuqta ruwaway, ama imamantapas p'enqakunaypaq. 81Kawsayniymi chiriyapushan qespichiwanaykita suyakuspa, simiykitan suyakushani. 82Ñawiymi utipushan prometewasqaykita suyakuspa. ¿Hayk'aqtaq sonqochawankiri? 83Qhechinchakama qara hinaña kani chaypas, manan unanchasqa simiykikunata qonqapunichu. 84¿Hayk'a watataq kamachiykiqa kawsasaq? ¿Hayk'aqtaq qatiykachawaqniykunata huchachanki? 85Anchaykachaqkunaqa t'oqokunatan ñoqapaq hasp'irqanku, paykunaqa manapunin yachachisqayki simita kasunkuchu. 86Llapa kamachikuyniykikunaqa cheqaqkaman, llullakuspan runakunaqa qatiykachawanku. ¡Yanapaykuway! 87Yaqallan kay pachamanta chinkachiwarqanku, ichaqa manan kamachikuy simiykikunata saqerqanichu. 88Munakuwaspayki kawsachikuway, hinan kamachikuyniykikunata hunt'asaq. 89Señor Diosníy, wiñaypaqmi simiykiqa, hanaq pachapi allin takyachisqan kashan. 90Cheqaq-kayniykiqa wiñay-wiñaypaqmi kashallanpuni, qanmi kay pachata allinta takyachirqanki, chaymi mana kuyurinchu. 91Tukuy imaymanan kunankama kashan, qanmi chay hina kananpaq kamachikurqanki, llapallanmi servisunkiku. 92Manachus yachachikuy simiyki kusichiwanman chayqa, ñan llakikuspa tukukuymanña karqan. 93Manan hayk'aqpas sut'inchasqa simiykikunata qonqasaqchu, chaykunawanmi kawsachiwarqanki. 94Qanpan kani, qespichiway, sut'inchasqa simiykikunatan munaykushani. 95Millay runakunan wañuchiwanankupaq suyapawanku, ñoqataq unanchasqa simiykikunata yuyani. 96Tukuy hunt'asqa ruwasqatapas tukukapuqllatan rikuni, kamachikuyniykikunan ichaqa mana tukukuq. 97¡Maytapunin yachachikuy simiykitaqa munakuni! P'unchay-ch'isiyaqmi chayllapiña yuyaymanani. 98Kamachikuyniykikunaqa ñoqallawanpunin kashan, chaykunan awqaykunamantapas aswan yachayniyoqman tukuchiwan. 99Kamachikuy simiykikunapi anchata yuyaykusqayraykun llapa yachachiwaqniykunamantapas astawan yachapuni. 100Sut'inchasqa simiykikunatan kasukuni, chaymi kurak runakunamantapas aswan yuyayniyoq kapuni. 101Simiykita hunt'anaypaqmi tukuy mana allin ñanmanpas mana thaskiykunichu. 102Qan kikiyki yachachiwasqaykiraykun chaninchayniykikunamanta mana t'aqakunichu. 103Simiykikunaqa ancha misk'in simiypaq, miel misk'imantapas aswan misk'in ñoqapaq. 104Sut'inchasqa simiykikunawanmi yuyayta hap'ini, chaymi llapa llulla kawsayta cheqnikuni. 105Simiykiqa purinaypaq lamparan, simiykiqa ñanniypaq k'anchaymi. 106Jurarqanin, hunt'asaqtaqmi, chanin unanchayniykikunatan hunt'asaq. 107Señor Diosníy, maytapunin llakikushani, ¡prometewasqaykiman hina kawsachiway! 108Señor Diosníy, agradecekuyniykunata chaskiykuway, chaninchasqaykikunatapas yachachiway. 109Wañuyqa qatiykachashallawanpunin, ichaqa manan yachachikuy simiykita qonqapunichu. 110Millay runakunan ñoqapaq toqllata churanku, ichaqa manan unanchasqa simiykikunamanta t'aqakunichu. 111Kamachikusqaykikunan wiñay herenciaykuna, chaykunan sonqoyta kusirichiwan. 112Unanchasqa simiykikuna hunt'aymanmi sonqollikuni, wiñay samiyoqmi kasaq. 113Iskay uya runakunatan cheqnikuni, yachachikuy simiykitataq munakuni. 114Qanmi pakaykuwaqniypas hark'aykuwaqniypas kanki, ñoqaqa simiykipin suyakuni. 115Millay runakuna, qayllaymanta anchhuriychis, Diosniypa kamachikuyninkunatan hunt'ayta munani. 116Prometewasqaykiman hina kallpachaway, hinan kawsasaq, ¡ama yanqachu suyachiway! 117Yanapaykuway, qespichisqan kasaq, unanchasqa simiykikunataqa hunt'allasaqpunin. 118Qanmi unanchasqa simiykikunamanta t'aqakuqkunata pisicharparinki, ídolo yupaychayninkuqa yanqalla kasqanrayku. 119Kay pacha lliw millay runakunatan q'opata hina wikch'unki, chaymi ñoqaqa kamachisqa simiykikunata munakuni. 120Cuerpoymi khatatatan qanta manchakuspa, huchachaq simiykikunatan manchakuni. 121Chaninkaqtan, allinkaqtan ruwarqani, ama sarunchaqniykunaman saqerpariwaychu. 122Prometeway kamachiykita yanapawanaykipaq, ama uma hoqariqkuna muchuchiwanankupaq. 123Qespichiwanaykita suyakuspan ñawiy utipushan, prometewasqaykiman hina chaninchawanaykita suyakuspa. 124Munakuyniykiman hina ñoqa kamachiykita rikuway, unanchasqa simiykikunata yachachiway. 125Kamachiykin kani, yuyayta qoway kamachikusqaykikunata yachanaypaq. 126Señor Diosníy, yachachikuyniykitan mana kasupunkuchu, chay hinaqa, paykunata muchuchinaykipaq tiempoñan. 127Kamachikuyniykikunatan qorimantapas astawanraq munakuni, sinchi ch'uya qorimantapas astawanraqmi munakuni, 128chaymi llapallan unanchasqa simiykikunaman hina kawsani, tukuy llulla kawsaytataq cheqnikuni. 129Unanchasqa simiykikunaqa utirayachikunmi, chaymi chaykunata kasuni. 130Simiykikuna sut'i willasqaqa runatan k'anchan, wawa hina sonqoyoqkunamanmi yuyayta qon. 131Kamachikuyniykikunataqa anchatapunin munakuni, sumaq mikhunamanta hinaraqmi wañukuni. 132Qhawarimuway, khuyapayaykuway, imaynatachus munakuqniykikunapaq ruwanki hinata. 133Simiykiwan allinta purichiway, ama ima mana allinpas atipawananta munaychu. 134Runakunaq sarunchawananmanta qespichiway, sut'inchasqa simiykikunata hunt'anaypaq. 135Sumaqta ñoqa kamachiykita qhawarimuway, unanchasqa simiykikunatapas yachachiway. 136Unuy-paratan waqani yachachikuy simiykita mana kasukusqankurayku. 137Señor Diosníy, qanqa chaninmi kanki, juzgasqaykikunapas chaninkaman. 138Ancha chaninmi churasqayki kamachikusqaykikunaqa, llapapaqmi chaninkama cheqaqkama. 139Sonqoymi anchatapuni sientishan, simiykikunata awqaykuna qonqapuqtinku. 140Cheqaqllañan simiykiqa, chaymi ñoqa kamachiykiqa chayta munakuni. 141Huch'uyllan kani, qhawarparisqan kani, chaypas manan sut'inchasqa simiykikunataqa qonqapunichu. 142Chaninchayniykiqa wiñaypaq chaninmi, yachachikuy simiykipas cheqaqmi. 143Llaki-phutiymi ñit'iwan, kamachikuyniykikunataq kusichiwan. 144Chanillanpunin unanchasqa simiykikunaqa, kawsanaypaq yuyayta qoway. 145Señor Diosníy, tukuy sonqon waqyakamuyki, kutichimuway, unanchasqa simiykikunatan hunt'asaq. 146Qantan waqyakamuyki, qespichiway, kamachikusqaykikunatan hunt'asaq. 147Manaraq pacha illarimushaqtinmi sayarimuspa yanapaykamuwanaykipaq mañakamuyki, prometewasqaykipin suyakuni. 148Tutantinmi rikch'ani, prometewasqaykipi yuyaymananaypaq. 149Señor Diosníy, munakuyniykiman hina kunkayta uyariykuway, chanin-kayniykiman hina kawsachiway. 150Qatiykachawaqniy millay runakunan asuykamuwanku, yachachikuyniykimantan karunchakapunku. 151Señor Diosníy, qanqa qayllallaypin kashanki, llapa kamachikuyniykikunapas cheqaqkaman. 152Kamachikusqaykikunata wiñaypaq churasqaykitaqa unayñan yachani. 153Llakikusqayta qhawarispa qespichiway, manan yachachikuy simiykitaqa qonqapunichu. 154Amachaykuway, kacharichiway, prometekusqaykiman hina kawsachiway. 155Millay runakunaqa manan qespichisqachu kanqaku, unanchasqa simiykikunata mana kasukusqankurayku. 156Señor Diosníy, ancha sumaq sonqon kanki, chaninchayniykiman hina kawsachiway. 157Askhan awqaykunapas sarunchaqniykunapas, ichaqa manan kamachisqa simiykikunamanta t'aqakunichu. 158Millakunin wasanchaqniykikunata qhawarispa, kamachikuyniykikunata mana kasukusqankurayku. 159Señor Diosníy, qhawariy imaynatachus sut'inchasqa simiykikunata munakusqayta, munakuyniykiman hina kawsachiway. 160Llapa simiykiqa cheqaqmi, llapa chanin juzgayniykikunaqa wiñaypaqmi. 161Kamachikuqkunan yanqa-nisqa qatiykachawanku, sonqoymi ichaqa simiykikunata manchakun. 162Simiykiwanmi q'ochukuni, askha qhapaq kayta tariq runa hina. 163Llullakuytan cheqnikuni, millakuni, yachachikuy simiykitan ichaqa munakuni. 164Chanin kuskachasqaykikunamantan qanchis kutita p'unchaypi yupaychayki. 165Yachachikuy simiykita munakuqkunaqa sumaqllatañan kawsanku, manan paykunataqa imapas misk'achinchu. 166Señor Diosníy, qespichiwanaykitan suyakuni, kamachikuyniykikunatataq hunt'ani. 167Kamachisqa simiykikunatan kasukuni, tukuy sonqon chaykunata munakuni. 168Kamachikusqaykikunatan sut'inchasqaykikunatan kasukuni, qanqa tukuy imayna kawsasqaytan yachanki. 169Señor Diosníy, waqyakusqayta uyariykamuway, simiykiman hina yuyayta qoway. 170Mañakusqayta uyariykamuway, prometewasqaykiman hina qespichiway. 171Unanchasqa simiykikunatan yachachiwarqanki, chaymi anchatapuni yupaychasqayki. 172Llapan kamachikuyniykikunan chaninkama, chaymi simiykikunamanta takisaq. 173Sut'inchasqa simiykikunata kasukunaypaqmi yuyaykukuni, makilla kashay yanapaykuwanaykipaq. 174Señor Diosníy, maytan qespichiwanaykita munani, yachachikuy simiykiwanmi q'ochukushani. 175Qanta yupaychanaypaq kawsachiway, chaninchasqa simiykikuna yanapaykuwachun. 176Chinkasqa oveja hinan puriripurqani, ichaqa manan kamachikuyniykikunata qonqapurqanichu, chayrayku, kamachiykita maskhaq hamuway.

will be added

X\