Salmos 118

1Señor Diosman graciasta qoychis, payqa allinmi, munakuyninqa wiñaypaqmi. 2Israel runakuna nichunku: Señor Diospa munakuyninqa wiñaypaqmi, nispa. 3Aarón ayllu nichunku: Señor Diospa munakuyninqa wiñaypaqmi, nispa. 4Señor Diosta manchakuqkuna nichunku: Señor Diospa munakuyninqa wiñaypaqmi, nispa. 5Llaki ñit'iwaqtinmi Señor Diosta waqyakurqani, paytaq uyarimuwarqan, hinaspan kacharichiwarqan. 6Señor Diosqa ñoqawanmi kashan, manan manchakunichu. ¿Imanawanmantaq runari? 7Señor Diosqa ñoqawanmi kashan, paymi yanapaykuwan, cheqnikuwaqniykunataqa atipasqatan rikusaq. 8Señor Diosman hap'ipaykukuymi aswan allinqa runaman hap'ipakuymantaqa. 9Señor Diosman hap'ipaykukuymi aswan allinqa umallikunaman hap'ipakuymantaqa. 10Llapa suyukunan muyuykuwarqan, ichaqa Señor Diospa sutinpin chaykunata atiparqani. 11Tukuyneqmantan muyuykuwarqanku, ichaqa Señor Diospa sutinpin chaykunata atiparqani. 12Wanqoyrukuna hinan muyuykuwarqanku, ichaqa khiska rawray hinallan tukukapurqanku, Señor Diospa sutinpin chaykunata atiparqani. 13Paykunan tanqarpariwarqanku, ñoqataq urmasharqaniña, Señor Diostaq yanapaykuwarqan. 14Señor Diosmi kallpachaqniypas amachaqniypas, paymi qespichikuwarqan. 15Chanin runakunaq karpankunapiqa Diospa yanapasqan atipaqkunan kusisqa takishanku: ¡Señor Diospa kallpanqa atipanmi! 16¡Señor Diosqa kallpasapallañan! ¡Señor Diospa kallpanqa atipanmi! nispa. 17Manapunin wañusaqchu, aswanpas kawsasaqmi Señor Diospa ruwasqankunata willanaypaq. 18Anchatapunin Señor Diosqa muchuchiwarqan, ichaqa manan wañunayta munarqanchu. 19Atipaqkunaq haykunan punkukunata kicharipuwaychis. Chay punkunkunatan haykusaq, Señor Diostan yupaychasaq. 20Kaymi Señor Diospa punkun, atipaqkunaqa chayninta haykuchunku. 21Señor Diosníy, uyariwasqaykiraykun yupaychayki, qespichiqniy kasqaykiraykun yupaychayki. 22Wasi perqaqkunaq wikch'usqan rumin esquina hap'iq kapun. 23Chayqa Señor Diospa ruwasqanmi, musphaspataq qhawashanchis. 24Kay p'unchaymi Señor Diospa atipasqan p'unchay, paywan kusikusunchis q'ochukusunchis. 25Señorniyku, rogakuykikun qespichiwanaykikupaq, Diosniyku mañakuykikun t'ikarichiwanaykikupaq. 26¡Saminchasqan Señor Diospa sutinpi hamuqqa! Señor Diospa wasinmantapachan qankunata saminchamuykiku. 27Señorqa Diosmi, paymi k'anchaykuwarqanchis. K'allma hap'intinkama fiesta ruwayta qallariychis, altar waqrakunaq kasqankama riychis. 28Qanqa Diosmi kanki, graciastan qoyki, Diosníy, hatunchamuykin. 29Señor Diosman graciasta qoychis, payqa allinmi, ¡munakuyninqa wiñaypaqmi!

will be added

X\