1 Señor Diosmi waqyakuspa mañakusqayta uyariwarqan, chaymi payta munakuni. 2 Makillan uyariykamuwarqan, chaymi llapa kawsasqay p'unchaykunapi payta waqyakusaq. 3 Wañuy manchapakuykunan ñit'iykuwarqan, Wañuy-pacha llaki-phutiykunan hap'iwarqan, llakipakuymi nanaymi muchuchiwarqan. 4 Chaypachan Señor Diosta waqyarikurqani: ¡Señor Diosníy, kawsayniyta qespichiway! nispa. 5 Señor Diosqa sumaq sonqon, chanintaqmi, Diosninchisqa khuyapayakuqmi. 6 Señor Diosqa wawa hina sonqoyoqkunatan waqaychan, mana kallpayoq kashaqtiymi qespichiwarqan. 7 Sonqolláy, kunanqa sumaqta samariy, Señor Diosqa sumaqta rikuwasqanrayku. 8 Paymi wañuymanta qespichiwarqan, paymi waqasqaytapas pichawarqan, paymi urmanaymantapas waqaychawarqan. 9 Chaymi kay pacha kawsaqkunawan kuska tiyaspa Señor Diospa qayllanpi purisaq. 10 ¡Sinchi llakiq ñit'isqan kashaspapas, ñoqaqa iñirqanin! 11 Mana imanaytapas atispan nirqani: Llapa runan llulla, nispa. 12 ¿Imatan Señor Diosman kutichipusaq tukuy allinkunata ruwapuwasqanmanta? 13 Vino ofrendatan Señor Diosman apasaq qespichiwasqanmanta agradecekunaypaq. 14 Llapa runakunaq rikushasqanmi Señor Diosman prometekusqaykunata qopusaq. 15 May llakikuymi Señor Diospaqqa payman sonqollikuqkunaq wañupusqanqa. 16 ¡Señor Diosníy, kamachiykipunin kani! ¡Warmi kamachiykiq wawanmi kani! Qanmi wañuymanta kacharichiwarqanki. 17 Agradecekuy sacrificiotan haywasqayki, Señor Diosníy, qanmantan mañakusqayki. 18 Llapa llaqtaykiq rikushasqanmi prometekusqaykunata qopusqayki, 19 wasiyki patiokunapin qopusqayki, Jerusalén llaqta ukhupin haywasqayki. ¡Yupaychasqa Señor Diosqa kachun!
