1 Señor Diosniyku, ama ñoqaykutachu hatunchawayku, aswanpas hunt'aq kasqaykirayku, munakuq kasqaykirayku, sutiykita hatunchakuy. 2 ¿Imanaqtintaq mana iñiqkunari ninkuman: Maypitaq Diosninkuri? nispanku. 3 Diosninchisqa hanaq pachapin kashan, tukuy ima munasqantan ruwan. 4 Idolonkuqa qolqemantan qorimantan, runaq ruwasqallanmi. 5 Simiyoqmi, manataq rimankuchu, ñawiyoqmi, manataq rikunkuchu, 6 ninriyoqmi, manataq uyarinkuchu, senqayoqmi, manataq muskhinkuchu, 7 makiyoqmi, manataq llaminkuchu, chakiyoqmi, manataq purinkuchu, manan rimarillankupaschu. 8 Idolokunata ruwaqkunaqa, idolokunapi iñiqkunaqa, chaykunamanmi rikch'akunku. 9 Israel runakuna, ¡Señor Diosman sonqollikuychis! Paymi yanapaykuqniykichispas waqaychaykuqniykichispas. 10 Aarón ayllu, ¡Señor Diosman sonqollikuychis! Paymi yanapaykuqniykichispas waqaychaykuqniykichispas. 11 Señor Diosta manchakuqkuna, ¡payman sonqollikuychis! Paymi yanapaykuqniykichispas waqaychaykuqniykichispas. 12 Señor Diosqa yuyarikuwanchismi, saminchaykuwasunmi. Israel runakunatan saminchaykunqa, Aarón ayllutan saminchaykunqa, 13 manchakuqninkunatan saminchaykunqa, huch'uytapas hatuntapas. 14 Señor Diosmi astawan mirachisunkichis, qankunatapas wawaykichistapas. 15 Hanaq pachatapas kay pachatapas kamaq Señor Diosmi saminchasunkichis. 16 Hanaq pachaqa Señor Diospa kaqninmi, kay pachatataqmi runaman qorqan. 17 Manan wañusqakunaqa Señor Diosta yupaychanqachu, manan hayk'an Wañuy-pachaman uraykuqkunapas hatunchanqachu. 18 Ñoqanchis kawsashaqkunan ichaqa kunanmanta wiñay-wiñaypaq Señor Diosta saminchasunchis. ¡Yupaychasqa Señor Diosqa kachun!
