1 ¡Yupaychasqa Señor Diosqa kachun! Señor Diospa kamachinkuna, ¡payta yupaychaychis! 2 ¡Kunanmanta wiñaypaq Señor Diospa sutinqa saminchasqa kachun! 3 ¡Inti lloqsimuymanta inti haykuykama Señor Diospa sutinqa yupaychasqa kachun! 4 Señor Diosqa llapa suyukunapipas hatunchasqan, qhapaq-atiyninqa hanaq pachantintan hunt'aykun. 5 Manan pipas Diosninchis Señor Dios hinaqa kanchu, payqa hanaqkunapin kamachikun, 6 chaypas hanaq pachata kay pachata qhawananpaqmi k'iraykamun. 7 Payqa wakcha runatan pampamanta hoqarin, mana imayoq runatan q'opa wikch'unamanta horqon, 8 umalli runakunatawan kuska tiyachinanpaq, llaqtan umalli runakuna ukhupi tiyachinanpaq. 9 Payqa mana wachakuq warmitan wachakuqman tukuchin, wawakunawanmi paytaqa kusichin. ¡Yupaychasqa Señor Diosqa kachun!
