Salmos 111

1¡Yupaychasqa Señor Diosqa kachun! Tukuy sonqon Señor Diosta yupaychasaq chaninkunaq huñunakusqanpi, llaqtallantin huñunakuqtin. 2Ancha hatunmi Señor Diospa ruwasqankunaqa, chaykunata allinpaq llapa qhawaqkunaqa chaykunatan t'aqwin. 3Ruwasqanqa munayllañan, qhapaq-atiynintan sut'inchan, chanin-kayninpas wiñaypaqmi kashan. 4Señor Diosqa musphanakunatan ruwarqan yuyarinapaq, payqa sumaq sonqoyoqmi khuyapayakuqmi. 5Yupaychaqninkunamanmi mikhuchin, rimanakusqantaqa yuyarillanpunin. 6Wak suyukunaq hallp'anta llaqtanman qospan, ruwasqankunawan llaqtanman atiyninta rikuchirqan. 7Payqa chanintan cheqaqtan imatapas ruwan, mana iskayrayanan kamachikusqan simikunaqa, 8wiñay-wiñaypaq allin churasqan, cheqaqkaman, chaninkaman. 9Llaqtantan kacharichirqan, wiñaypaqmi rimanakuyninta unancharqan. Payqa Ch'uyan, Manchanan. 10Yachayniyoq kanapaqqa Señor Diostaraqmi manchakuna, kamachikuyninkunata kasukuqqa allin yuyayniyoqmi. ¡Diosqa yupaychasqallapunin kanqa!

will be added

X\