Salmos 109

1Yupaychanay Diosníy, ama upallakuyñachu. 2Llullakuy simiwanmi, mana chanin simiwanmi millayta rimakuwanku, llullakuspan k'amiwanku. 3Cheqnikuyta munaspan muyuykuwanku, yanqa-qasipunin maqawanku. 4Paykunatan munakuni, chaywanpas paykunaqa tumpakuywanmi kutichiwanku, ñoqataq ichaqa paykunapaq mañapuni. 5Allinkaqmantan mana allinkaqwan kutichiwanku, munakusqaymantan cheqnikuwanku. 6Millay runata paypaqqa juezta churay, juzganapi paytaqa ch'atachun. 7Juzgasqa kaspa huchachasqa kachun, mañakusqallantaq paytaqa huchachachun. 8Ama unaytachu kawsachun, wak runataq ruwananta hap'ichun. 9Wawankuna mana taytayoq kapuchun, warminpas viuda qhepachun. 10Wawankunapas tomaqaya kapuchun, mañapakuspa purichun, thunisqa wasinkumanta paykunata wikch'upuchunku. 11Manuqnin lliw kaqninkunata hap'ikapuchun, wak llaqtayoqkuna llank'asqanta llat'anachun. 12Ama pipas khuyapayaykuqnin kachunchu, amallataq wakcha wawankunata pipas llakipayaykuq kachunchu. 13Llapa miraynin tukukapuchun, qhepa miraypi sutin wiñaypaq chinkapuchun. 14Taytanpa huchallikusqanta Señor Diosqa yuyarichun, mamanpa huchallikusqanpas amataq chinkachunchu, 15Señor Diosqa huchankuta yuyarishallachunpuni, kay pachapipas paykunaqa qonqasqa kachunku. 16Manan payqa llakipayakuyta yuyarillarqanpaschu, aswanmi payqa wakchakunata, khuyay kaqkunata qatiykacharqan, llakiq ñit'isqankunatapas wañuchinankama. 17Hukkunata ñakayllatapuni munaqmi karqan, kunanqa ñakasqallataq paypas kachun. Manapunin saminchayta munaqchu karqan, paypas amallataq saminchasqachu kachun. 18Paypaqqa p'acha churakuy hinan ñakayqa karqan, paypaqqa unu ukyaykuy hinan ñakayqa karqan, paypaqqa tullunkunamanmi ñakayqa aceite hina wiswiykurqan. 19Ahinaqa, p'acha hina payta p'istuykuchun, chumpi hinataq payta mat'iykuchun. 20Ahinata Señor Diosqa ch'atawaqniykunaman pagapuchun, ñoqamanta millayta rimaqkunamanqa chay hinatapuni kutichipuchun. 21Apu Señor Diosníy, ñoqata ichaqa khuyakuwaspayki yanapaykuway, sutiyki yupaychasqa kananpaq, munakuq sonqo kaspayki qespichiway. 22Mana imayoq wakchan kashani, sonqo nanasqan kashani. 23Llanthu hinan chinkaripushani, langosta hinan chhaphchisqa kashani. 24Ayunasqaywanmi moqoykuna mana takyanchu, mana mikhuspaymi tulluyapushani. 25Runakunaq asipayananmi kashani, rikuwaspankun asikuspa umankuta maywikunku. 26Yanapaykuway, Diosnilláy Señor Dios, munakuyniykiman hina qespichiway. 27Kayqa qanpa ruwasqayki kasqanta yachachunku, Señor Diosníy, qanpa qespichiwasqayki kasqayta yachachunku. 28Paykunaqa ñakashawachunkupas, qantaq saminchashallawaypuni. Paykunaqa sayarishachunkupas, ichaqa p'enqachisqa kachunku, ñoqa kamachiykitaq kusikusaq. 29Ch'ataqniykunaqa anchatapuni p'enqakuchunku, p'enqasqa k'umuykachachunku. 30Anchatapunin Señor Diosman graciasta qosaq, askha runa ukhupin payta yupaychasaq. 31Payqa wakcha runamanmi sayakun, wañunanpaq huchachasqakunatan qespichin.

will be added

X\