Salmos 108

1Diosníy, sonqoyqa wakichisqañan kashan, tukuy kallpaywan qanman takinaypaq, qanta yupaychanaypaq. 2¡Rikch'ariy, tawtinkulláy! ¡Rikch'ariy, arpalláy! ¡Pacha illarimuytan rikch'arisaq! 3Señor Diosníy, llaqtakuna ukhupin yupaychasqayki, lliw suyukuna ukhupin takipusqayki. 4Munakuyniykiqa hanaq pachamantapas aswan hatunmi, hunt'aq-kayniykiqa phuyuq kasqankaman aypan. 5Diosníy, hanaq pachapi hatunchasqa kasqaykita rikuchikuy, qhapaq-atiyniyki kay pachantinman hunt'aykuchun. 6¡Uyarimuwayku! ¡Atiyniykiwan qespichiwayku! ¡Munakusqaykikunata qespichiwayku! 7Diosmi ch'uya wasinmantapacha nimurqan: May kusisqan Shehemta rakisaq, Sucot wayq'otan tupusaq. 8Galaad ayllupas Manasés ayllupas ñoqaqmi, Efraín ayllupas churakunay cascon, Judá ayllupas kamachikunay varan, 9Moab suyupas maqchikunay puruñan. Edom suyumanmi usut'ayta wikch'uykusaq, Filistea runakunata llallispaymi qaparisaq, nispa. 10¿Pitaq allin perqasqa llaqtaman apawanqa? ¿Pitaq Edom suyuman pusawanqa? 11Diosníy, qanmi wikch'uwarqankiku, ¡manañan ejercitoykuwan purinkiñachu! 12Awqayku atipayta yanapaykuwayku, yanqan runaq yanapakuyninqa. 13Diospa yanapayninwanmi may musphanakunata ruwasun, paymi awqanchiskunata sarunqa.

will be added

X\