Salmos 107

1Señor Diosman graciasta qoychis, payqa allinmi, munakuyninqa wiñaypaqmi. 2Señor Diospa qespichisqankunaqa nichunku: Awqamantan Señor Diosqa qespichimuwanku, 3karu suyukunamantan huñuykamuwanku, wichaymanta, uraymanta, inti lloqsimuymanta, inti haykuymantawan, nispa. 4Ch'usaq ch'inneqnintan chinkasqa purirqanku, tiyanankupaq llaqtaman rina ñantan mana tarirqankuchu, 5yarqasqa kaspan wañunayarqanku, ch'akisqa kaspan pisi kallpayarqanku. 6Llaki-phutiyninkupin Señor Diosman waqyakurqanku, paytaq paykunata llakikusqankumanta horqorqan. 7Chaymantataq paykunata cheqan ñanninta pusarqan, maypichus tiyananku llaqtaman. 8Señor Diosta munakuyninmanta agradecekuychis, runakunapaq musphana ruwasqankunamanta: ¡Gracias! niychis. 9Payqa ch'akichikuqmanmi ukyachin, yarqachikuqkunatan allinkunawan saksachin. 10Laqha tutayaqpin tiyasharqanku, sinchi llakiq ñit'isqan fierro cadenawan watasqa preso hina, 11Diospa kamachikuyninkunata mana kasukusqankurayku, Ancha Hatun Diospa yuyaychayninkunata pisichasqankurayku. 12Diosmi paykunata sinchita llank'achispa k'umuykachirqan, urmaqtinkuqa manan pipas yanapaykurqanchu. 13Chaymi llaki-phutiyninkupi Señor Diosman waqyakurqanku, paytaq muchusqankumanta qespichirqan, 14laqha tutayaqmantan horqorqan, preso kasqankumantan kacharichirqan. 15Señor Diosta munakuyninmanta agradecekuychis, runakunapaq musphana ruwasqankunamanta: ¡Gracias! niychis. 16Bronce punkukunatan p'akirqarirqan, fierro p'utikunatan chhallurqarirqan. 17Mana chanin ruwasqankuraykun mana yuyayniyoq kapurqanku, huchallikusqankuraykun llakipi rikukurqanku. 18Mikhuytan millakurqanku, wañuy punkumanñan chayarqanku. 19Ichaqa llaki-phutiyninkupin Señor Diosman waqyakurqanku, paytaq muchusqankumanta qespichirqan, 20rimarispanmi paykunata qhaliyachirqan, aya p'ampanamantan paykunata qespichirqan. 21Señor Diosta munakuyninmanta agradecekuychis, runakunapaq musphana ruwasqankunamanta: ¡Gracias! niychis. 22Agradecekuy sacrificiokunata payman haywaychis, ruwasqankunatapas kusisqa takin-takin willariychis. 23Lamar-qochanta barcopi puriqkunan, hatun qochapi negociaqkunan, 24Señor Diospa ruwasqankunata chaypi rikurqanku, musphana kamasqankunata chay ukhupi rikurqanku. 25Pay rimariqtinmi manchay wayra hatarirqan, phoqchiqeyninkunatan sayarichirqan. 26Barcopi puriqkunan wichaymanraq seqarqanku, uraykamuspataq ukhumanraq chinkaykurqanku, mana allinpi kaspan q'aqchasqallaña kasharqanku. 27Machasqa hinan thampiykacharqanku, tukuy yachayninkupas yanqan karqan. 28Ichaqa llaki-phutiyninkupin Señor Diosman waqyakurqanku, paytaq muchusqankumanta qespichirqan. 29Manchay wayratan thanichirqan, manchay phoqchiqeytan sayachirqan. 30Manaña phoqchiqesqanta rikuspan kusikurqanku, Diosmi chayay munasqanku cheqasman pusarqan. 31Señor Diosta munakuyninmanta agradecekuychis, runakunapaq musphana ruwasqankunamanta: ¡Gracias! niychis. 32Llaqtaq huñukuyninpi payta hatunchaychis. Kurak runakunaq huñukuyninpi payta yupaychaychis. 33Paymi mayukunata ch'inneq pampaman tukuchin, unu pukyukunatapas ch'aki pampaman tukuchin, 34ruruchiq hallp'atapas qollpa pampaman tukuchin, chaypi tiyaqkunaq millaykunata ruwasqankurayku. 35Paymi ch'inneq pampata unu qocha-qochaman tukuchin, ch'aki pampata unu pukyukunaman tukuchin. 36Chaypin yarqasqakunata tiyachin, paykunataq tiyanankupaq llaqtata sayarichinku. 37Chakrakunatan tarpunku, uvas chakrakunatan llank'anku, askhatataq rurusqata huñunku. 38Paykunatan saminchaykun, chaymi anchatapuni askhayanku, uywankupas manan pisiyanchu. 39Paykunaqa, ñak'ariypi kaspan pisiyachisqa karqanku, llakiq ñit'isqan kaspan k'umuykachisqa karqanku. 40Diosqa cheqnikunmi sarunchaqkunataqa, paykunataqa mana ñanniyoq ch'inneqnintan chinkasqata purichirqan. 41Wakchakunatan ichaqa wakcha kasqankumanta horqon, oveja t'aqakunata hinan ayllunkutapas askhayachin. 42Chayta rikuspan chanin runakunaqa kusikunku, tukuy mana chanin runataq upallakapunku. 43¿Pillapas yuyayniyoq kanchu? Chaykunata reparachun, Señor Diospa munakuynintapas chaninchaykuchun.

will be added

X\