Salmos 106

1¡Yupaychasqa Señor Diosqa kachun! Señor Diosta yupaychaychis, payqa allinmi munakuyninqa wiñaypaqmi. 2¿Pitaq Señor Diospa musphana ruwasqankunata rimarinman? ¿Pitaq payta yupaychana kasqanta willakunman? 3Kusisamiyoqmi chanin-kayman hina kawsaqkunaqa, kusisamiyoqmi chaninkaqllatapuni ruwashaqkunaqa. 4Señor Diosníy, llaqtaykita munakusqaykirayku yuyarikuway, llaqtaykita qespichiq hamuspa yanapaykuway, 5akllakusqaykikunaq kusisaminta rikunaypaq, llaqtaykiq kusikusqanwan kusikunaypaq, suyuykiwan q'ochukunaypaq. 6Ñawpa taytayku hinan huchallikurqayku, mana chaninkaqtan ruwarqayku, mana allinkaqtan ruwarqayku. 7Egiptopi kashaspa ñawpa taytaykuqa manan musphana ruwasqaykikunata chaninpaqchu qhawarirqanku, ancha hatun munakuyniykitan qonqapurqanku, Puka Qocha patapin awqayki sayarirqanku. 8Ichaqa ancha atiyninta rikuchinanpaqmi sutinta yupaychanapaqmi Diosqa paykunata qespichirqan. 9Puka Qochatan phiñarirqan, chaytaq ch'akirqapurqan, hinaspan ch'aki pampanta hina qocha ukhunta paykunata chimpachirqan. 10Cheqnikuqninkumantan paykunata qespichirqan, awqankumantan paykunata kacharichirqan. 11Unun awqankutaqa millp'uykurqan, manan huknillankupas kawsarqanchu. 12Hinan ñawpa taytaykuqa prometesqankunata creerqanku, payta yupaychaspan takirqanku. 13Ichaqa usqhayllatan Diospa ruwasqankunata qonqapurqanku, manataq paypa yuyaychayninta chaskirqankuchu. 14Chay ch'inneqpin ima munasqankuta mikhuykuyta munarqanku, mana imaq kasqanpin Diosta wateqarqanku. 15Diosmi imatachus mañakusqankuta qorqan, ichaqa wañuna onqoywanmi paykunata hap'ichirqan. 16Karpa-karpapin Moisesta envidiakurqanku, Señor Diospa ch'uyanchasqan Aarontapas envidiakurqanku. 17Chaypachan pampa kicharikurqan, hinaspan Datanta millp'uykurqan, Abiram t'aqatapas p'ampaykurqan. 18¡Ninan chay t'aqa contra rawrarirqan! ¡Nina rawraymi millay runakunata ruphaykurqan! 19Horeb orqopin torillota ruwarqanku, qorita unuyachispa ruwasqanku idolotan yupaycharqanku. 20Qhapaq-atiyniyoq Diosninkuta yupaychanankutaqa q'achu mikhuq toroq rikch'aynintan yupaycharqanku. 21Qespichiqninku Diostan qonqapurqanku, Egiptopi musphana ruwasqankunatan qonqapurqanku, 22Campa miraynin suyupi musphanakuna ruwaqtan qonqapurqanku, Puka Qochapi utirayana ruwasqankunatan qonqapurqanku. 23Hinaqtinmi Diosqa paykuna wañurqarichiyta yuyaykurqan, ichaqa akllakusqan Moisesmi paykunapaq mañapurqan, k'arak phiñakusqantan thanichirqan ama paykunata wañurqarichinanpaq. 24Ima munay suyutan wikch'uykukurqanku, manan Diospa simi rimarisqanta creerqankuchu. 25Karpanku ukhupin Señor Dios contra chhuchupakurqanku, manan simintapas kasurqankuchu. 26Chaymi payqa makinta haywarispa jurarqan chay ch'inneqpi paykunata wañuchinanpaq, 27suyukunaman mirayninkuta wikch'unanpaq, llaqtakunaman paykunata ch'eqechinanpaq. 28Baal-peor diostan yupaycharqanku, wañusqakunaman haywasqa mikhunatan mikhurqanku. 29Millay ruwasqankuwanmi Diosta phiñachirqanku, hinan wañuy onqoy paykunata mast'arqan, 30ichaqa Fineesmi sayarispa huchallikuqta wañuchirqan, chaymi onqoyqa sayarparirqan. 31Chay chanin ruwasqanmantan Diosqa payta chaninpaq qhawarirqan, chay hinan wiñaypaq kanqa. 32Meriba unuq kasqanpin Diosta phiñachillarqankutaq, hinan paykuna hawa Moisespaq mana allinchu kapurqan, 33manañan Moisesqa pacienciakuyta atirqanñachu, chaymi mana rimananta rimarqan. 34Señor Diosmi paykunata kamachirqan llaqtakunata wañuchinankupaq, ichaqa manan wañuchirqankuchu, 35aswanmi mana iñiyniyoqkunawan mich'ukurqanku, hinaspan imaymana ruwasqankuta yachaqakurqanku. 36Idolonkutan yupaycharqanku, chaykunan paykunata waqllichirqan. 37Churinkutan ususinkutan supaykunaman sacrificiopi haywarqanku. 38Mana huchayoq churinkutan, ususinkutan wañuchirqanku, paykunatan Canaán suyu idolokunaman sacrificiopi haywarqanku, chay suyutaq yawar hich'asqawan qhellichasqa karqan. 39Ahinatan ruwasqankuwan qhellichakurqanku, ruwasqankuwanpas wasancharqanku. 40Chaymi Señor Diosqa llaqtanpaq k'arakta phiñakurqan, hinan paykunata cheqnikurqan. 41Mana iñiyniyoq suyukunamanmi hap'iykachirqan, cheqnikuqninkutaq paykunata kamachirqan. 42Awqankun paykunata saruncharqan, paykunatan pasaqta k'umuykachirqan. 43Askha kutitan Diosqa paykunata kacharichirqan, paykunataq ichaqa yuyaykusqankupi k'ulluchakurqanku, huchallikushaspankun pisi kallpayapurqanku. 44Chaywanpas, llaki-phutiypi kashasqankuta rikushaspanmi, waqyakusqankutapas uyarishaspanmi, 45paykunarayku Diosqa rimanakusqanta yuyarirqan, hinaspan ancha hatun munakuyninman hina llamp'uyapurqan. 46Llapa preso apaqninkunawanpas paykunataqa sumaqtan khuyapayachirqan. 47¡Qespichiwayku Diosniyku, Señor Dios! Suyukuna ukhumanta huñumuwayku, ch'uya sutiykiman graciasta qonaykupaq, q'ochukuspa qanta yupaychanaykupaq. 48Israelpa Diosnin Señorqa wiñay-wiñaypaq saminchasqa kachun. Llaqtallantintaq nichunku: ¡Amén! ¡Yupaychasqa Señor Diosqa kachun! nispa.

will be added

X\