Salmos 105

1¡Señor Diosman graciasta qoychis! ¡Paymanta mañakuychis! Ruwasqankunata llaqtakunaman willaychis. 2Señor Diosman takiychis, payman yupaychaykunata takiychis, tukuy musphana ruwasqankunata willaychis. 3Ch'uya sutinpi kusikuychis, Señor Diosta yupaychaqkuna kusikuychis. 4Señor Diosman qayllaykuychis, atiyninman hap'ipakuychis, Señor Diostaqa maskhallaychispuni. 5Señor Diospa musphana ruwasqankunata yuyariychis, Señor Diospa milagronkunata chaninchayninkunata yuyariychis, 6qankuna, Diospa kamachin Abrahampa mirayninkuna yuyariychis, qankuna, Diospa akllakusqan Jacobpa churinkuna yuyariychis. 7Paymi Diosninchis Señor Diosqa, paymi kay pachantinta kamachiqqa, 8payqa rimanakusqanta yuyarillanpunin, waranqa mirayña pasaqtinpas kamachikusqantaqa yuyarillanpunin. 9Abrahamwan rimanakusqantaqa yuyarillanpunin, Isaacman jurasqantaqa yuyarillanpunin. 10Chaytan Jacobpaq unancharqan, Israelpaq wiñay rimanakuyta churaspa nirqan: 11Qanmanmi Canaán hallp'ata qosqayki, chaymi kanqa herenciaykichis, nispa. 12Paykunaqa pisi runakunallan karqanku, wak llaqtayoq hinan chay hallp'api pisilla karqanku, 13huk llaqtamanta huk llaqtamanmi purirqanku, huk suyumanta huk suyumanmi rirqanku. 14Señor Diosqa manan piqpa sarunchanantapas munarqanchu, paykunaraykun reykunatapas anyarqan: 15Akllakusqaykunataqa aman llamiykunkichischu, profetaykunataqa aman imanankichispaschu, nispa. 16Chay suyumanmi yarqayta chayachimurqan, llapa mikhuytan qechupurqan. 17Ñawpaqenkutan huk qharita kacharqanku, kamachipaq vendesqanku Josetan kacharqanku. 18Chakinkunatan thunkunawan t'eqerqanku, kunkanmantan cadenawan watarqanku. 19Señor Diospa siminmi Joseta probaykurqan, Josepa willakusqan hunt'akunankama. 20Rey Faraomi payta kacharinapaq kamachikurqan, llaqtakuna kamachiqmi payta kacharichipurqan. 21Wasinpi kamachikunanpaqmi Joseta churarqan, llapa kaqninkunapi kamachikunanpaq, 22kamachikuq runakunata munasqanman hina yachachinanpaq, kurak runakunatapas hamawt'aman horqonanpaqwan. 23Chaymantataq Israelqa Egiptoman rirqan, Jacobmi Campa miraynin suyupi tiyapakurqan. 24Señor Diosqa anchatapunin llaqtanta askhayachirqan, Egipto runakunamantapas aswan kallpasapatan ruwarqan. 25Egipto runakunaq sonqontan t'ikrarqan llaqtanta cheqnikunankupaq, kamachinkunata q'otunankupaq. 26Diosqa kamachin Moisestan kacharqan, akllakusqan Aarontawanmi kacharqan. 27Paykunan ch'inneqpi Diospa señalninkunata ruwarqanku, Campa miraynin suyupi utirayana musphanakunata ruwarqanku. 28Egipto runakunaqa manan Diospa siminkunata chaskirqankuchu, chaymi Diosqa suyuntinman tutayaykachimurqan. 29Ununkutan yawarman tukuchirqan, challwankutan wañuchirqan. 30Suyunkupin k'ayrakuna wakwarirqan, reyninkuq puñunan wasikunamanmi hunt'aykurqan. 31Dios rimariqtinmi askhallaña ch'uspi hunt'aykurqan, usapas Egipto suyuntinmanmi hunt'aykurqan. 32Parachimunantaqa chikchichimurqanmi, suyuntinpin lliphllikiyninta rawrarichirqan. 33Uvas chakrankutapas higos sach'ankutapas saqtarqanmi, suyuntinpi sach'akunatapas p'akirqarirqanmi. 34Dios rimariqtinmi langostakuna chayarqan, mana yupay atina askhallañan langostakuna karqan. 35Suyuntin qoratan q'ararqan, chakraq llapallan rurusqantan mikhurqan. 36Kikin Egiptopin llapa phiwi churinkuta wañuchirqan, llapa kurak churinkutan sipirqan. 37Diosqa llaqtantan horqomurqan, qorintinta qolqentinta pusamurqan, ayllunku ukhupiqa manan pipas laq'akurqanchu. 38Egipto runakunan puririqta rikuspanku kusikurqanku, sinchi manchasqapunin kasharqanku. 39Diosmi phuyuchimurqan paykunata llanthuykunanpaq, ninatataq churarqan tuta paykunata k'anchaykunanpaq. 40Mikhunata mañakuqtinkun yuthukunata chayachimurqan, hanaq pacha t'antawanmi paykunata saksachirqan. 41Qaqata ch'eqtaqtinmi unu phullpumurqan, ch'aki pampantan mayu hina phawarqan. 42Kamachin Abrahamman ch'uya simi rimarisqantan yuyarirqan. 43Llaqtantan kusisqata horqomurqan, akllakusqankunatan may kusisqa takishaqta pusamurqan. 44Wak suyukunaq hallp'antan paykunaman qorqan, chay wak llaqtakunaq llank'akusqankutan hap'ikurqanku. 45Diosqa munarqan kamachikusqankunata hunt'anankutan, yachachisqankunatapas kasunankutan. ¡Yupaychasqa Señor Diosqa kachun!

will be added

X\