1 ¡Tukuy sonqoywanmi Señor Diosta saminchasaq! Señorníy, mayna hatunmi kanki. Diosníy, qhapaq-atiywanmi, lliphipipiywanmi p'achakunki, 2 k'anchaywanmi capawan hina p'istukunki. Qanmi hanaq pachata karpata hina chutarqanki, 3 qanmi hanaq unu patapi wasiykita sayarichirqanki. Phuyukunatan carretaykiman tukuchinki, wayra patapin phawanki. 4 Wayrakunatan willaqniykikunaman tukuchinki, ninaq qallusqankunatan kamachiykikunaman tukuchinki. 5 Qanmi kay pachata allinta teqsicharqanki sayashasqanmanta ama hayk'aqpas kuyurinanpaq. 6 Kay pachatan p'achawan hina lamar-qochawan qataykurqanki, orqokunatan unu millp'urqan. 7 Phiñariqtiykin unuqa ayqerqan, q'aqyasqayki kunununuqtinmi usqhaylla phawarirqan. 8 Orqokunaman wichaspa, qheswakunaman uraykuspa, maypichus kananpaq nisqaykiman chayarqan. 9 Qorpatan unupaq churarqanki ama wasapananpaq, amaña hallp'a pachata millp'unanpaq. 10 Qanmi wayq'okunamanta unuta phullpuchimunki, chaymi orqokuna chawpinta mayukuna phawan. 11 Chay unutan llapa salqa uywakuna ukyanku, chaywanmi salqa asnokuna ch'akiyninkuta thasnukunku. 12 Chay mayu patakunapin phalaq animalkuna q'esachakunku, chay sach'a-sach'apin takiykunku. 13 Qanmi hanaq pachaykimanta orqokunata paraykiwan qarpamunki, sumaq sonqo-kayniykiwanmi hallp'atapas saksaykachinki. 14 Q'achutan uywakunapaq wiñachinki, q'omerkunatan runaq allinninpaq wiñachinki, chaymi hallp'amanta mikhuyta horqon, 15 kallpachaykuqnin t'antatan ruwan, kusirichiqnin vinotan ruwan, uya llamp'uyachina aceitetapas ruwan. 16 Señor Diospa sach'ankunamanmi allinta paran, Libanopi paypa mallkisqan cedrokunamanmi allinta ch'aqchun. 17 Chaykunapin pichinchukuna q'esachakun, hatunkaqninpitaq cigüeña tiyan. 18 Hatun orqokunaqa salqa cabrakunapaqmi, qaqakunapitaq purun qowikuna pakakun. 19 Killatan ruwarqanki tiempokunata señalananpaq, intipas yachanmi ima horastachus haykupunanta. 20 Inti haykupuqtinmi tutayaykachinki, chaypin yunka llapa animalkuna wakwarimunku. 21 León uñakunan mikhunata maskhaspa qaparinku, mikhunankutan Diosmanta mañakunku. 22 Inti lloqsimuqtinmi ripunku, hinaspan t'oqonkupi puñukampunku. 23 Hinan runaqa llank'ananman lloqsin, ch'isiyaykuykamataq llank'an. 24 Señor Diosníy, ¡mana yupay atiyraqmi ruwasqaykikunaqa! Llapallantan yachaywan ruwarqanki, kamasqaykikunan teqsimuyuntinta hunt'aykun. 25 Haqay lamar-qochaqa may hatunllañan mast'arikushan, chaypin askhallaña animalkuna wakwarishan, hatunraq huch'uyraq. 26 Chaypin barcokuna purin, chaypin kamasqayki Leviatanqa kashan, chaypin chay hatunkaray animalqa pukllan. 27 Llapallankun suyakushasunkiku tiempollanpi paykunaman mikhuchinaykipaq. 28 Qoykuqtiyki hinan paykunaqa chaskikunku, haywariqtiyki hinan allinkaqwan saksaykunku. 29 Uyaykita pakaykuqtiykiqa mancharikunkun, samayninkuta qechuqtiykiqa wañukapunkun, ñut'u hallp'amantaq tukupunku. 30 Kawsachiq samaywan phukuykuqtiykin kamasqa kanku, kay pachaq rikch'aynintan llanllarichinki. 31 ¡Wiñaypaq Señor Diospa qhapaq-atiyninqa kachun! ¡Señor Diosqa kamasqanwan kusikuchun! 32 Pay qhawariqtinmi kay pacha khatatatan, pay llamiykuqtinmi orqokuna q'osñirin. 33 Señor Diosmanmi kawsashaspay takisaq, Señor Diosniytan kawsanaykama yupaychasaq. 34 Tukuy yuyaymanasqay Señor Diospaq hina kachun, payllawanmi ñoqaqa kusikuni. 35 Kay pachamanta huchasapakunaqa chinkapuchunku, millay runakunaqa tukukapuchunku. Tukuy sonqoywanmi Señor Diosta saminchasaq. ¡Yupaychasqa Señor Diosqa kachun!
