1 Tukuy almaywanmi Señor Diosta saminchasaq, tukuy sonqoywanmi ch'uya sutinta saminchasaq. 2 Tukuy almaywanmi Señor Diosta saminchasaq, tukuy allin ruwapuwasqantaqa manan qonqasaqchu. 3 Paymi lliw mana chanin ruwasqaykunatapas pampachaykuwaqqa, paymi lliw onqoyniytapas qhaliyachiwaqqa. 4 Paymi aya p'ampanamanta kawsayniyta qespichiwaqqa, paymi munakuwaspa khuyakuwaspa saminchaykuwaqqa. 5 Paymi tukuy allinkaqwan hunt'aykuwaqqa, wakmanta waynayaykachiwaspa ankata hina kallpachawaqqa. 6 Señor Diosmi cheqaqta chaninchaqqa, paymi sarunchasqakunapaq kuskachapuqqa. 7 Yuyaykusqankunatan Moisesman willarqan, ruwasqankunatapas Israel runakunaman rikuchirqan. 8 Señor Diosqa khuyapayakuqmi sumaq sonqoyoqmi, mana usqhaylla phiñakuqmi, ancha munakuqmi. 9 Manan sapa kutillachu anyashawanchis, manan sapa kutillachu phiñapayawanchis. 10 Manan mana chanin ruwasqanchiskunaman hinachu ñoqanchistaqa muchuchiwanchis, manan huchanchiskunaman hinapaschu pagawanchis. 11 Imaynan hanaq pachaqa kay pachamanta aswan wichaypi kashan, ahinatan manchakuqninkunapaq munakuyninta hatunta mast'arimurqan. 12 Imaynan inti lloqsimuyta inti haykuytawan karunchan, ahinatan huchanchiskunata karunchawanchis. 13 Imaynan taytaqa wawankunata khuyayta munakun, ahinatan Señor Diosqa manchakuqninkunata khuyayta munakun. 14 Payqa reqsiwanchismi imayna kasqanchista, yuyarikuwanchismi ñut'u hallp'a kasqanchista. 15 Runaq kawsayninqa qora hinallan, campopi t'ika hinallan t'ikan, 16 chayman wayrarimuqtinmi chinkapun, manañataq pipas maypichus kasqanta yachapunchu. 17 Señor Diosqa manchakuqninkunatan wiñay-wiñaypaq munakun, llapa mirayninkupaqpas sumaq sonqollapunin. 18 Chhaynatan rimanakusqanta hunt'aqkunataqa munakun, kamachikusqankunata mana qonqaspa kasuqkunataqa munakun. 19 Señor Diosmi hanaq pachapi kamachikuy tiyananta churarqan, hinantin pachakunatataq kamachishan. 20 ¡Atiyniyoq angelninkuna, Señor Diosta saminchaychis! ¡Señor Diosta uyariq angelninkuna, Señor Diosta saminchaychis! ¡Munayninta ruwaq angelninkuna, Señor Diosta saminchaychis! 21 ¡Hanaq pachapi llapallaykichis, Señor Diosta saminchaychis! ¡Munayninta ruwaq kamachinkuna, Señor Diosta saminchaychis! 22 Maykunapichus kamachikusqankunapi llapallan kamasqankuna, ¡Señor Diosta saminchaychis! ¡Tukuy sonqoywanmi Señor Diosta saminchasaq!
