Salmos 102

1Señor Diosníy, mañakamusqayta uyariykuway, waqyakamusqayta uyariykuway. 2Llaki ñit'ishawaqtinqa ama qheparpariwaychu, maki uyariykamuway, waqyakamuqtiyqa usqhaylla kutichimuway. 3Kawsayniymi q'osñi hina chinkapushan, tulluykunan nina sansa hina ruphaykushan. 4Sonqoymi naq'esqa qora hina ch'akiykapushan, manañan mikhunayawanpasñachu. 5Hik'ipakuspa anchisqaywanmi tullullaña ch'akiykapushani. 6Ch'inneqpi tiyaq suweq'ara hinan kani, thunisqa wasipi tiyakuq huku hinan kani. 7Manan puñunichu, wasi patapi sapallan pichinchu hinan kani. 8Sapa p'unchaymi awqaykunaqa k'amiwanku, phiñapayawaqniykunaqa sutiypin hukkunata ñakanku. 9Ñoqaqa usphatan t'antata hina mikhuni, ukyanaytapas weqeywanmi chhaqruni, 10k'arakllataña phiñakusqaykirayku. Qanmi hoqariwarqanki, hinaspa wikch'uwarqanki. 11Kawsayniyqa llanthu hinan chinkaripushan, qora hinan ch'akiykapushan. 12Señor Diosníy, qanmi ichaqa wiñaypaq kamachikushanki, sutiykitaqa tukuy mirayllapunin mentanqa. 13Qanmi Sión llaqtata khuyapayanaykipaq sayarinki, ñan tiempoqa hunt'akamunña, ñan payta khuyapayanayki tiempoña. 14Kamachiykikunaqa rumi soqyankunatapas munakunkun, perqanpa thunikusqanmantapas llakikunkun. 15Llapa suyukunan Señor Diosta manchakunqaku, kay pachantin reykunapas qhapaq-atiynintan manchakunqaku. 16Sión llaqtata wakmanta sayarichispanmi, qhapaq-atiyninpi rikhurimuspanmi, 17wikch'usqa runaq mañakusqanta uyarinqa, paykunaq mañakusqantaqa manan pisichanqachu. 18Kaymi qhepa miraykunapaq qelqasqa kanqa, paykuna Señor Diosta yupaychanankupaq. 19Señor Diosmi ch'uya hanaqmantapacha qhawamurqan, hanaq pachamantapachan kay pachata qhawamurqan, 20presokunaq anchisqanta uyarinanpaq, wañuchinapaq nisqakunata kacharinanpaq. 21Sión llaqtapi Señor Diosmanta willanankupaq, Jerusalén llaqtapi payta yupaychanankupaq. 22Llapallan llaqtakunapas suyukunapas hukllaman huñuykukuspankun, Señor Diosta yupaychanqaku. 23Paymi waynallaraq kashaqtiy pisi kallpayachiwarqan, kawsayniytapas pisiyachiwarqan. 24Ñoqan nini: Diosníy, ama munaychu mana wañunaypi wañunayta, qanqa wiñay-wiñaypaqmi kawsanki, nispa. 25Qallariypin kay pachata teqsicharqanki, hanaq pachatapas qanmi ruwarqanki. 26Chaykunan tukukapunqa, qanmi ichaqa kashallankipuni. Llapallanmi p'acha hina mawk'ayapunqa, p'achata hinan qanqa chaykunata cambianki, hinan wikch'usqa kapunqaku. 27Qanmi ichaqa kaqllapuni kanki, manan wataykikunapas tukukunqachu. 28Kamachiykikunaq wawankunaqa mana manchakuspallan tiyakunqa, qayllallaykipipunin wawankuqa kashanqa.

will be added

X\