1 Yachaymi wasinta perqarqan, qanchis tusakunata llaqllarqan. 2 Uywakunatan nak'arqan, allin vinotan tupachirqan, mikhunatan mast'arqan. 3 Warmi kamachinkunatan kacharqan llaqta qhawana patamanta waqyamunankupaq: 4 ¡Pisi yuyayniyoqkuna kayman hamuychis! nispa. Mana yuyayniyoqkunatapas waqyachirqan: 5 Hamuychis, t'antayta mikhuychis, tupachisqay vinotapas ukyaychis. 6 Pisi yuyayniyoq-kayta saqepuychis, hinaspa kawsaychis, yuyayniyoq runa hina puriychis, nispa. 7 Uma hoqariqta anyaqqa millay k'amisqan rikukunqa, millay runata phiñariqqa pisichasqan rikukunqa. 8 Ama uma hoqariqtaqa phiñariychu, paqtan cheqnikusunkiman, yachayniyoqta anyaykuy, payqa munakusunkin. 9 Yachayniyoqta yachachiy, aswan yachaysapan kanqa, chanin runata yachachiy, aswan yachaysapan kanqa. 10 Yachayniyoq kanapaqqa ñawpaqtaraqmi Señor Diosta manchakuna, yuyayniyoq kanapaqqa Ch'uya Diostaraqmi reqsina. 11 Ñoqa Yachay kaqtiymi unayta kawsanki, askha watatan kawsankipas. 12 Yachayniyoq kanki chayqa, qanllapaqmi kanqa, uma hoqariqtaq kanki chayqa, qanllan muchunki. 13 Mana yuyayniyoq-kayqa simisapa warmi hinan, payqa lonlataq mana ima yachaqtaqmi. 14 Wasin punku tiyanapin tiyaykun, llaqta patapin tiyaykun, 15 hinaspan ñan purikuqkunata purinankuta purishaqkunatapas waqyan: 16 ¡Pisi yuyayniyoqkuna, kayman hamuychis! nispa. Mana yuyayniyoqkunatapas waqyallantaq: 17 Suwasqa unuqa misk'in, pakapi mikhusqa t'antapas sumaqmi, nispa. 18 Ichaqa manan yachankuchu chaypi wañusqakuna kashasqanta, waqyasqankunaqa Wañuy-pachaq sonqonpi kashasqanta.
