Proverbios 8

1¿Pin waqyakun? Yachaymi. ¿Pin qaparin? Yuyaymi. 2Ñan qaylla moqo patakunapin, ñan palqakunapin sayaykun, 3llaqta punku cheqaskunapin, punku haykunakunapin waqyakun: 4Runakuna, qankunamanmi waqyakamuykichis, runakunamanmi rimarimuykichis. 5Pisi yuyayniyoqkuna, allin reparayta yachaychis, qankunapas, mana yuyayniyoqkuna, allin yuyayta hap'iychis. 6Ancha sumaqkunatan rimarisaq, chaninkunatan rimarisaq, chayrayku uyariwaychis. 7Simiyqa cheqaqkaqtan rimanqa, millakunin llullakuytaqa. 8Chanintakaman rimani, simiykunapiqa manan ima waqllisqapas kanchu, manallataq ima q'ewisqapas kanchu. 9Llapallanmi chaninkama allin yuyayniyoqpaqqa, allin yuyaykusqakunan yachayniyoqkunapaqqa. 10Yachachikuyniyta akllakuychis qolqemantaqa, reqsiq-kayta akllakuychis ch'uya qorimantaqa. 11Ñoqa Yachayqa aswan allinmi kani, chaniyoq umiñakunamantaqa, tukuy ima munanaykichispas manan ñoqamanqa aypawanchu. 12Ñoqa Yachayqa allin yuyaywanmi tiyani, ñoqan allinta reparaspa yuyaykukuyta yachani. 13Señor Diosta manchakuyqa mana allinkaqta cheqnikuymi, ñoqan cheqnikuni anchaykachaytawan uma hoqariytawan, hinallataq millay ruwaytapas, waqllisqa rimaytapas. 14Ñoqaqmi yuyaychaypas yuyaykukuypas, ñoqaqmi allin yuyaypas atiypas. 15Ñoqa kaqtiymi reykunaqa kamachikunku, kamachikuqkunapas chanin kamachikuykunata churanku. 16Ñoqa kaqtiymi umallikunaqa kamachinku, llapa chanin kamachikuqkunapas chaninchanku. 17Ñoqan munakuni munakuwaqniykunata, maskhawaqniykunapas tariwankun. 18Ñoqan qhapaqchanipas hatunchanipas, cheqaq allin-kaytapas qhapaqyaytapas qoni. 19Aswan allinmi qosqayqa ch'uya qorimantapas, aswan allinmi munachisqayqa ch'uyayachisqa qolqemantapas. 20Ñoqan chanin ñanninta purini, chaninchayta ruwaspa purini, 21munakuwaqniykunata qhapaqyachispa, illakunata wasinkuman hunt'achispa. 22Señor Diosmi ruwayta qallarishaspa churawarqan, ñawpaqmantaña, ruwasqankunapas manaraq kashaqtin. 23Ñawpaqmantañan churasqa karqani, hallp'a pachatapas manaraq kamashaqtin. 24Hatun lamar-qochakuna manaraq kashaqtinmi, pukyukunapas manaraq phullpumushaqtinmi paqarichisqa karqani. 25Orqokunapas manaraq takyachisqa kashaqtinmi, moqokunapas manaraq kashaqtinmi paqarichisqaña karqani, 26manaraqmi hallp'a pachapas kamasqachu karqan, manaraqmi campokunapas kamasqachu karqan, manaraqmi ñut'u hallp'allapas kay pachapi kamasqachu karqan. 27Hanaq pachata takyachishaqtinqa, hatun lamar-qocha patapi qorpata seq'eykushaqtinqa, chaypin ñoqaqa kasharqani. 28Hanaq pachapi phuyuta takyachishaqtinqa, lamar-qocha ukhu pukyukunata takyachishaqtinqa, chaypin ñoqaqa kasharqani. 29Qorpa churasqanmanta ama wasapananpaq lamar-qocha unuta kamachishaqtinqa, hallp'a pachaq teqsinkunata teqsichashaqtinqa, chaypin ñoqaqa kasharqani. 30Chaypachan ñoqaqa paywan llank'asharqani, sapa p'unchaymi payta kusichirqani, qayllanpin pukllashallarqanipuni, 31kamasqan pachapin pukllarqani, runa miraymi kusichiwarqan. 32Kunanqa churiykuna, uyariwaychis, kusisamiyoqmi yuyaychayniykunata waqaychaqkunaqa. 33Yachachikuyta uyarikuychis, hinaspa yachayniyoq kaychis, amataq chayta pisichaychischu. 34Kusisamiyoqmi uyariwaqniy runaqa, sapa p'unchay suyawaspa wasi punkuykunata qhawaqqa. 35Tariwaqniyqa kawsaytan tarin, Señor Diospa allin qhawarisqantaqmi kanqapas. 36Ñoqamanta karunchakuqmi ichaqa pay kikinpa contranpi huchallikun, llapa cheqnikuwaqniykunaqa wañuytan munanku, nispa.

will be added

X\