Proverbios 7

1Churilláy, simiykunata waqaychay, kamachikuy simiykunata illata hina waqaychay. 2Chayta ruwaspaykin kawsanki, yachachikuyniykunata ñawi ruruykita hina waqaychay. 3Chaykunata dedoykikunaman wataykuy, chaykunata sonqoykipi yuyashallaypuni. 4Yachayta panachakuy, allin yuyayta aylluchakuy. 5Chaykunan wasanchaq warmimanta karunchasunki, sonqo suwaq wak warmimantapas waqaychasunki. 6Ñoqan huk p'unchay wasiy ventanapi sayasharqani, hinaspa k'aktumanta qhawasharqani. 7Malqo waynakunatan rikusharqani, hinaspan paykuna ukhupi huknin pisi yuyayniyoq waynata rikurqani. 8Calleta rishaspanmi chay warmiq tiyasqan esquinaman chayasharqan, chay warmiq wasin qayllantan purisharqan 9ch'isiyaykuyta, rasphiyaykuqtinña, tutayaykuyta, laqhayaykuytaña. 10Chayllamanmi chay warmi paywan tinkuq lloqsimurqan, rabona p'achayoq, q'otunanpaq yuyaykuspa, 11qhalincha mana p'enqakuq, manan chakinqa wasinpi takyanñachu. 12Mayninpin callepi kashan, mayninpitaq plazakunapi, esquina-esquinakunapin qhamiyashan. 13Waynatan oqllaykurqan, hinaspan much'aykurqan, mana p'enqakuspan payta nirqan: 14–Kunan p'unchaymi Diosman prometesqayta haywamuni, hinan sumaq kawsay sacrificio mikhuna aycha wasiypi kashan. 15Chaymi qanwan tinkuq lloqsimuni, qanwan tupaykuytapunin munasharqani, tariykipunitaq kanpas. 16Puñunaytan mast'arqamuni Egipto linomanta awasqa munay chusikunawan. 17Puñunaytan ch'aqchumuni q'apaq mirrawan, aloewan, canelapiwan. 18Haku, illariqta munanakamusun, amikunanchiskama wayllunakamusun. 19Manan qosayqa wasipichu, karutan purin. 20Ch'uspa hunt'a qolqetan aparikun, pura killa p'unchaytañan kutimpunqa, nispa. 21Misk'ita rimapayaspanmi uyachirqan, sonqo suwaq siminwanmi waynata uyachirqan. 22Hinan warmiq qhepanta phawarirqanpacha, imaynan wakaqa nak'anaman rin hina, imaynan tarukapas trampaman haykun hina, 23chaypitaq wach'iqa sonqonman ch'antakun, imaynan phalaq animalpas toqllaman phawaykun hina, manataq wañunanta yachakunchu. 24Chhaynaqa, churiykuna, uyariwaychis, rimasqaykunata maki uyariwaychis. 25Ama chay warmiman sonqollikuychu, ama qhepanta rispa pantaykuychu. 26Askhatañan payqa waqllichirqan, askhatañan payqa wañuyman q'epiykurqan. 27Wasinman puriyqa Wañuy-pachaman puriymi, chayman riyqa wañuyman riymi.

will be added

X\