Proverbios 6

1Churilláy, runamasiykipaqchus fiakunki chayqa, wak runapaqchus simiykita kacharinki chayqa, 2simi rimarisqaykiwanchus watachikunki chayqa, simi rimarisqaykiwanchus hap'ichikunki chayqa, 3churilláy, ñan hukpa makinmanña chayarqanki, kacharichikunaykipaqqa kayta ruway: Amigoykiqta riy, hinaspa k'umuykukuspa valekamuy kacharichikunaykipaq. 4Ama puñuykuychu, ama ch'illmirillaypaschu, 5aswanpas chakuqmanta luychu hina ayqekuy, phalaq animal hina toqllamanta kacharichikuy. 6Yaw qella, sisita qhawariy, imayna ruwasqanta qhawamuy, hinaspa sisimanta yachaqakuy. 7Chay sisin mana qollananpas mana kamachiqninpas mana patronninpas kashaqtin, 8mikhunanta ichhuy tiempopi waqaychakun, mikhunanta cosecha p'unchaykunapi huñun. 9Yaw qella, ¿hayk'aqkamataq puñunki? ¿Hayk'aqkamataq wikch'urayanki? 10Nishanki: Huk chhikallantawan puñurisaq, huk chhikallantawan ch'illmirisaq, puñunaypaq huk chhikallantawan makiyta oqllarisaq, nispa. 11Pisichikuyniykiqa llat'anaq runa hinan hap'irqosunki, wakchayayniykipas maqanantin runa hinan ayparqosunki. 12Millay runaqa, waqllisqa runaqa, millay simikunata rimaspan purin, 13ñawinkunawanmi q'esuykun, chakinwanmi señaschan, dedonwanmi t'uphsiykun. 14Waqllisqa sonqoyoqqa mana allillantapunin yuyaykun, ch'aqwallatapunin sayarichin. 15Chaymi hatun muchunanqa qonqaylla chayamunqa, qonqayllan ñut'usqa kanqa, manataqmi khuyalliykukuy kanqachu. 16Soqta ruwaytan Señor Diosqa cheqnikun, qanchiskaqtataqmi sonqonpas millakun: 17Lerq'opayakuqta, llullakuqta, mana huchayoq runakunata wañuchiqta, 18mana chanin yuyaykukuykunata paqarichiq sonqoyoqta, mana allinkaqman usqhaylla phawariqta, 19llullakuspa yanqa tumpaq testigota, wawqekuna purapi ch'eqmita sayarichiqtawan. 20Churilláy, taytaykiq kamachikuyninta waqaychay, amataq saqepuychu mamaykiq yachachikuynintapas. 21Chaykunata sonqoykipi hap'illaypuni, chaykunata kunkaykiman walqakullaypuni. 22Puriqtiykin pusasunki, puñuqtiykin waqaychasunki, rikch'aqtiykin rimapayasunki. 23Chay kamachikuy simikunaqa lamparan, chay yachachikuypas k'anchaymi, kunaykuspa anyakuykunaqa imaynatachus kawsanatan yachachin: 24millay warmimanta waqaychakuyta, wasanchaq warmiq misk'i rimayninmantapas cuidakuyta. 25Ama sumaq rikch'ayninta sonqoykipi munapakuychu, ama ñawinkunawanpas suwachikuychu. 26Rabona warmiqa mana imayoqtan qharita sayarichin, wasanchaq warmiqa qharitan wañuyman q'epiykun. 27Ninata oqllaykukuqqa, ¿manachu p'achanta ruphachikunman? 28Nina sansa patapi puriqqa, ¿manachu chakinta ruphachikunman? 29Chhaynan runamasinpa warminwan puñuqqa manapunin huchachasqa kaymantaqa ayqenqachu. 30Suwataqa pisipaqmi hap'inku, yarqachikuspa saksaykunanpaq suwakuqtinqa. 31Hap'ichikuspanmi ichaqa qanchis kutita kutichipunqa, hinaña tukuy wasi kawsayninta qoykapunqa chaypas. 32Wasancha huchallikuqmi ichaqa mana yuyayniyoq, chayta ruwaqqa pay kikintan waqllichikun. 33K'irisqan p'enqachisqan kanqa, manan imapas p'enqachisqa-kaynintaqa chinkachinqachu. 34Rawraq sonqo qosaqa nina hinan rawrarinqa, vengakuspaqa manataqmi khuyapayanqachu. 35Manan ima haywarisqatapas munanqachu, manan lluk'iykuykunatapas chaskikunqachu, chaniyoqña chaykuna kashaqtinpas.

will be added

X\