Proverbios 5

1Churilláy, yachayniyta maki uyariy, allin yuyayniyta maki uyariy, 2allintapuni reparaspa yuyaykukunaykipaq, allin yachaywan rimanaykipaq. 3Wasanchaq warmiqa misk'itan riman, rimasqanqa aceitemantapas aswan llamp'un, 4qhepamanmi ichaqa ajenjomantapas aswan hayata paqarichin, iskay filoyoq espadamantapas aswantan k'irin. 5Payqa wañuymanmi pusaykusunki, ñanninqa Wañuy-pachamanmi apaykun. 6Payqa manan kawsay ñanta qhawarinchu, kawsayninqa waqllisqan, manan payqa reparakunchu. 7Chay hinaqa, churiykuna, uyariwaychis, amataq simiykunamanta t'aqakuychischu. 8Chay wasanchaq warmimanta karunchakuy, ama wasi punkullanmanpas asuykuychu, 9ama kallpaykita yanqa usuchiychu, amataq wataykikunatapas millay runaman qoychu. 10Paqtan huk runakuna qhapaq kayniykiwan q'ochukunkuman, llank'asqaykikunapas wak runata qhapaqyachinman. 11Paqtan qhepaman llakipakuwaq cuerpoyki toqtiyaykapuqtin, 12hinaspataq niwaq: ¡Imaynataraqmi kunaykuyta cheqnikurqani! ¡Imaynataraqmi sonqoypas anyaykuyta pisicharparirqan! 13Manan yachachiwaqniykunaq siminta uyariyta munarqanichu, manan yachachiwaqniykunata makichu uyarirqani, 14sinchi mana allin patapiñan kashani llaqtay runaq llapanpa rikushasqan, nispa. 15Unu p'uytullaykimanta ukyakuy, p'uytuykimanta phullpumuqta ukyakuy. 16¿Pukyuyki unuta calleman llimp'achiwaqchu? ¿Phullpumuq unuykita plazakunaman usuchiwaqchu? 17Qanllapaq chaykunaqa kachun, ama hukkunamanwanqa ukyachiychu. 18Pukyuykiqa saminchasqa kachun, wayna kashaspa casarakusqayki, warmillaykiwan kusikuy, 19payqa munasqa china taruka hinan, munaycha luychu hinan. Paypa munakuyninwanqa kusikushallaypuni, munakuyninqa sonqoykita suwashallachunpuni. 20Churilláy, ¿imanaqtintaq wak warmimanqa wañuytaraq k'askakunki? ¿Imanaqtintaq wasanchaq warmiwanqa oqllanakunki? 21Runaq imayna kawsasqanqa Señor Diospa rikusqanmi kashan, paymi tukuy purisqankunata qhawashan. 22Millay runataqa millay ruwasqankunallataqmi mayt'un, huchallanwantaqmi watachikun. 23Payqa kikinta mana cuidakusqan hawan wañunqa, sinchi mana yuyayniyoq kasqanmi wañuyman q'epiykunqa.

will be added

X\