1 Wawaykuna, taytaykichispa yachachisqasuykichista uyariychis, allin yuyayniyoq kanaykichispaq maki uyariychis. 2 Ñoqan allin yachachikuyta yachachiykichis, chaytaqa ama wikch'urpariychischu. 3 Ñoqapas taytayoq churin karqani, mamaypa munakusqan sapallan wawan. 4 Taytaymi yachachiwaspa niwaq: Rimasqaykunata sonqoykipi hap'iy, kamachikusqaykunata hunt'ay, chaymi kawsanki. 5 Yachayta tariy, allin reparayta tariy, rimasqaykunataqa ama qonqapuychu, amallataq chaykunataqa wikch'uypaschu. 6 Ama yachayta saqepuychu, payqa waqaychasunkin, yachayta munakuy, payqa amachasunkin. 7 Yachayqa tukuy imamantapas ancha chaniyoqmi, chayrayku tariy, tukuy ima hayk'a kaqniykimantapas allin yuyaytaraq tariy. 8 Chayta munakuy, paypas hatunchallasunkitaqmi, chayman sonqollikuy, paypas allinpaqmi hap'ichisunki. 9 Munay t'ika pilluta hinan umaykiman churaykusunki, munayllaña coronatan qosunki, nispa. 10 Churilláy, uyariway, simiykunata chaskiy, askha watakunata kawsanaykipaq. 11 Yachay ñannintan pusarqayki, cheqan ñannintan thaskichirqayki. 12 Purispaykiqa manan rank'ukunkichu, phawaspaykipas manan misk'akunkichu. 13 Yachachisqa simiman k'askakuy, ama kachariychu, chayman hina ruway, chayqa kawsayniykin. 14 Ama waqllisqakunaq ñannintaqa puriychu, ama millaykunaq purisqanta hinaqa puriychu, 15 karunchakuy, ama chayninta puriychu, chaymanta anchhuriy, pasarparillay. 16 Manan paykunaqa puñunkuchu mana allinkaqta mana ruwaspaqa, paykunataqa manan puñuypas aysanchu pitapas mana urmaykuchispaqa. 17 Paykunapaqqa mana chanin ruwaymi t'anta mikhuy hina, runakunata maqaspa qechuymi vino ukyay hina. 18 Chaninkunaq puriyninqa pacha illarimuy k'anchay hinan, allinta p'unchayamuqtin aswan-aswanta k'anchariq hinan. 19 Mana chaninkunaq puriyninmi ichaqa laqhayaq hina, manataq yachankuchu imapichus misk'akusqankuta. 20 Churilláy, simiykunata kasukuy, rimasqaykunata maki uyariy. 21 Ama qonqapuychu, chaykunata sonqoykipi waqaychay. 22 Chaykunata tariqpaqqa kawsaymi, cuerpontinpaqpas hampin. 23 Sonqoykitaqa allintapuni waqaychay, chaymantan imayna kawsaypas paqarimun. 24 Ama llullakuyta rimaychu, ama waqllisqata rimaychu. 25 Ñawpaqllatapuni qhaway, ñawiykikunaqa ñawpaqllatapuni qhawachun. 26 Purinaykita allinta tanteay, allillantapuni sarunaykipaq. 27 Ama pañamanpas lloq'emanpas pantaychu, ama mana allinpi puriychu.
