Proverbios 31

1Masa llaqtapi tiyaq rey Lemuelpa siminkuna. Kay simikunataqa mamanmi payman yachachirqan: 2¿Ima nisqaykin wawalláy? ¿Ima nisqaykin sonqo rurulláy? ¿Ima nisqaykin Diosmanta mañakusqay wawalláy? 3Ama kallpaykitaqa warmikunapi tukuychu, amallataq usuchiychu reykunata waqllichiq warmikunapiqa. 4Lemuel, manan reykunapaqqa allinchu vino ukyayqa, manallataqmi kamachikuqkunapaqpas allinchu poqosqa vinota munapakuyqa, 5paqtan chayta ukyaykuspa kamachikuy simita qonqapunkuman, hinaspa llapa wakchakunaq derechonta waqllichinkuman. 6Wañunayashaqman machachikuq ukyanata qoychis, haya sonqoyoqkunamantaq vinota qoychis. 7Ukyachunku, hinaspa wakcha kasqankuta qonqachunku, muchusqankutapas amañataq yuyarichunkuchu. 8Mana rimarichisqapaq rimaripuy, wikch'usqakunata amachay. 9Rimariy, chaninninpi kuskachay, wakchapas k'umuykukuqpas uyarichikuqtin yanapaykuy. 10Sasan ancha allin warmi tariyqa, umiñakunamantapas aswanraqmi chaniyoq-kayninqa. 11Paymanmi qosanqa sonqollikun, qosanqa imaymanayoqmi kanqa. 12Qosanpaqqa tukuy kawsasqan p'unchaykunapin allillantapuni ruwan. 13Allin millmatan allin linotan tarimun, k'uchitaqmi llank'an. 14Payqa negociaqpa barcon hinan, karumantan mikhunata apamun. 15Tutaraq hatarispan wawankunaman mikhunata haywan, hinallataq warmi uywasqankunamanpas haywan. 16Chakratan allinta tantean, hinaspa chayta rantin, llank'aspa tarisqanwanmi uvas chakrata ruwan. 17Mana mancharispan llank'an, kallpasapa kaspan llank'an. 18Qhawarinmi qhatusqanqa allinyashasqanta, tutakaman llank'anpas. 19Makinwanmi phuskanpas phillillutapas muyuchin. 20Wakchamanmi qoykun, pisichikuqmanmi yanapaykun. 21Rit'iqtinqa manan familianmanta llakikunchu, familianqa llapallanmi phatu p'achawan p'achasqa kashan. 22Payqa chusikunatan awakun, ñañuy-ñañu linomantawan sani-puka millmamantawanmi p'achakun. 23Qosanqa llaqta haykuna huñukuna cheqaspi allin reqsisqan kurak runakunawan kuska tiyaykuqtin. 24Payqa lino p'achakunatan awaspa venden, rantiqkunamanmi chumpikunatapas venden. 25Payqa allin kallpayoqmi allin respetanan, manan qhepa p'unchaykunamantapas llakikunchu. 26Yachaywanpunin rimarin, ancha munakuywantaq yachachinpas. 27Familianpa imaynatachus kawsasqantan qhawarin, manataqmi mikhunatapas mana llank'aspachu mikhun. 28Wawankunan sayarispa payta saminchanku, qosanpas paytaqa hatunchallantaqmi: 29Askha warmikunan allinkunata ruwanku, qanmi ichaqa llapankumantapas aswan allinraq kanki, nispa. 30Sonqo suwaq munaycha-kayqa q'otullan, sumaq rikch'ayniyoq-kayqa yanqallan. Señor Diosta manchakuq warmitaqa respetanan. 31Ruwasqankunamanta allinwan payman kutichiychis, tukuy ima ruwasqanmanta llaqta haykuna punkukunapi payta hatunchachunku.

will be added

X\