Proverbios 30

1Masa llaqtapi tiyaq Jaquepa churin Agurpa rimasqankuna. Agurmi Itielta Ucaltawan nirqan: 2–Ñoqaqa runakuna ukhupi aswan mana yuyayniyoqpunin kani, manan runaq yuyaynin yuyayniyoqpaschu kani. 3Ñoqaqa manan yachaytaqa yachaqarqanipaschu, manallataqmi Ch'uya Diosmantaqa imatapas yachanichu. 4¿Pin hanaq pachaman wicharqan, hinaspa uraykamurqan? ¿Pin wayrata makinwan hap'iykurqan? ¿Pin lamar-qochata ponchonpi khipuykurqan? ¿Pin kay pacha teqsimuyuntinta allinta sayachirqan? ¿Iman sutin? ¿Iman churinpa sutin? ¡Yachankichus chayqa, willaway! 5Diospa llapa siminqa cheqaqpunin, Diosqa payman pakaykukuqkunatan hark'aykun. 6Ama siminkunaman yapaykuychu, phiñarisunkimanmi, hinan llulla rikhuriwaq. 7Diosnilláy, iskayllatan mañakuyki, manaraq wañukapushaqtiy chaykunataqa qoykuwaypuni: 8Llullakuytapas runa q'otuytapas karunchaway, ama wakchayachiwaypaschu qhapaqyachiwaypaschu, sapa p'unchay mikhunallayta qoykuway, 9paqtan askhallaña kaqniyoq kaspa negapuykiman, hinaspa niyman: ¿Pitaq Señor Diosqa? nispa. Otaq wakchayapuspa suwakuyman, hinaspa sutiykita sarunchayman. 10Ama kamachitaqa patronninpa qayllanpi tumpaykuychu, paqtan pay ñakasunkiman, hinaspa muchuwaq. 11Kanmi taytanta ñakaq runa, mamantapas mana saminchaq. 12Kanmi ch'uya kasqanta yuyaq runa, qhelli-kayninmanta manaña ch'uyanchakushaspapas. 13Kanmi allichachaq kasqantapuni yuyaq runa, hukkunatataq hatunchakuywan qhawaykuq. 14Kanmi runa, kirunkun espadakuna hina, maran kirunkupas cuchillokuna hinan, paykunan suyupi kaq wakchakunata oqoykunku, runakuna ukhupi kaq pisichikuqkunatapas millp'uykunku. 15Iskay ususiyoqmi unu k'uykaqa, chaykunan: ¡Qoway! ¡Qoway! nispallapuni qaparinku. Kinsan mana hayk'aq saksaq, tawakaqqa manan hayk'aqpas: Chayllataña, ninchu: 16Wañuy-pacha, mana wiksallikuq warmi, unullata ch'onqaq ch'aki hallp'a, mana hayk'aq: “Chayllataña” niq nina. 17Pipas taytanta asipayan chayqa, mamantapas pisichaspa mana kasunchu chayqa, wayq'opi kaq alqamarikuna ñawinta sik'ichunku, anka uñakunapas aysachunku. 18Kinsa cosasmi musphachiwan, tawakaqtapas manan entiendenichu: 19Wayrapi imaynatachus ankaq phalasqanta, qaqa patapi imaynatachus mach'aqwaypa suchusqanta, lamar-qocha ukhupi imaynatachus barcoq purisqanta, sipaspa imaynatachus qhariwan hukllachakusqanta. 20Wasanchaq warmiqa kay hinatan ruwan: Mikhun, siminta pichakun, hinaspa nin: Manan ima mana chanintapas ruwanichu, nispa. 21Kinsa t'aqa runakunan kay pachataqa kuyurichin, tawakaq t'aqataqa manan muchuyta atinchu: 22Kamachi runa rey kapuqtin, mana yuyayniyoq runa allinta saksaykuqtin, 23mana munasqa warmi casarakuqtin, kamachi warmi patronanpa rantinpi patrona kapuqtin. 24Tawan kay pachapi aswan huch'uy animalkunaqa, chaywanpas chaykunaqa aswan yachaysapan: 25Sisikuna: Chaykunaqa manan kallpayoq llaqtachu, chaywanpas cosecha tiempopin mikhunankuta huñunku. 26Qowikuna: Chaykunaqa manan kallpachasqa llaqtachu, chaywanpas qaqapin wasichakunku. 27Langostakuna: Chaykunaqqa manan reyninku kanchu, chaywanpas llapallankun wachuchasqa lloqsinku. 28Qaraywachakuna: Chaykunaqa makiwan hap'irqonallan, chaywanpas reykunaq qhapaq wasinpin kashan. 29Kinsan kusa puriqkuna, tawakaqtaqmi aswan qharitapuni purin: 30León: Chayqa llapa animalkuna ukhupi kallpasapan, manan imapas qatirinchu, 31anchaykachaq k'anka, hinallataq orqo cabrapas, mana piqpa kutichinan reypas. 32Mana yuyaywanchus hatunchakuyta munarqanki chayqa, mana allinkaqkunatapas ruwayta yuyaykurqanki chayqa, ¡allintapuni yuyaykuy! 33Lechetachus qaywinki chayqa, mantequillatan horqonki, senqaykitachus sinchita “qhen” nichinki chayqa, yawartan horqonki, runamasiykitachus k'arakta phiñarinki chayqa, ch'aqwaymi kanqa.

will be added

X\