Proverbios 3

1Churilláy, ama yachachikuy simiykunata qonqapuychu, kamachikuyniykunata sonqoykipi waqaychay, 2chaymi unayta kawsanki, anchatapunin t'ikarinki. 3Munakuynillayoqpuni kashay, cheqaqllapipuni kashay, chay hina kawsaytaqa rikuchishallaypuni, chaykunataqa sonqoykipi yuyashallaypuni. 4Hinan allin qhawarisqapas “allinmi” nisqapas kanki, Diospa ñawpaqenpipas runakunaq qayllanpipas. 5Tukuy sonqoykiwan Señor Diosman hap'ipakuy, amataq qan kikiykiq yuyayniykimanqa k'askakuychu. 6Tukuy ruwasqaykikunapi Señor Diosta yuyariy, paymi cheqan ñanninta pusasunki. 7Ama yuyaykuychu yachaysapa kasqaykita, Señor Diosta manchakuspa mana allinmanta t'aqakuy. 8Cuerpoykipaqmi hampi kanqa, tulluykikunapaqmi qhali-kay kanqa. 9Señor Diosta tukuy kaqniykikunawan yupaychay, hinallataq chakraq rurusqan ñawpaq hoqarisqaykikunawanpas, 10chaymi taqeykikunaqa mikhuywan hunt'a kanqa, vino waqaychanaykikunapas phoqchinqaraq. 11Churilláy, Señor Diospa wanachiynintaqa ama pisichaychu, amallataq anyaykuyninwanpas amikuychu. 12Payqa pitachus munakusqantan wanachin, imaynan huk taytapas munakusqan churinta wanachin hinata. 13Kusisamiyoqmi yachayta tariq runaqa, allin yuyaytapas tariq runaqa. 14Yachayqa qolqeq interesninmantapas aswanraqmi, qorimantapas aswantaraqmi qhapaqyachin. 15Umiñakunamantapas aswan chaniyoqmi yachayqa, manan ima munasqaykipas yachaymanqa aypanmanchu. 16Paña makinwanmi unay kawsayta haywarimusunki, lloq'e makinwantaq qhapaq kaytapas samitapas haywarimusunki. 17Yachayqa sumaq ñanninkunatan pusasunki, payqa thak-kaypin kawsachisunki. 18Yachayqa kawsay sach'a hinan chayta chaskikuqkunapaqqa, kusisamiyoqmi yachayman k'askakuqkunaqa. 19Señor Diosqa yachaywanmi kay pachata teqsicharqan, yuyaywanmi hanaq pachata allinta sayachirqan. 20Yachayninwanmi lamar-qochata rakirqan, phuyumantapas iphuchimurqan. 21Churilláy, allin reparayta allin yuyaykukuyta waqaychay, ama chaykunataqa qonqapuychu, 22allintan kawsachisunki, kunka walqana hinataqmi sumaqchasunki. 23Chaypachan mana manchaspa purinki, manataqmi misk'akunkipaschu. 24Puñuspaykipas manan manchakunkichu, siriykuspaykipas misk'itan puñunki. 25Aman qonqaylla mancharichiqta manchakunkichu, amallataq millay runakunaman muchuna chayamuqtinpas manchakunkichu, 26Señor Diosmi qayllaykipi kashanqa, paymi mayt'ukunaykimanta waqaychasunki. 27Yanapayta atispaykiqa yanapana runata yanapaykuy. 28Imachus qonaykipaq makiykipi kashaqtinqa, ama runamasiykita niychu: Ripuy, kutimunkiña, paqarinña qosqayki, nispaqa. 29Wasimasiyki qayllaykipi tiyaspa qanpi hap'ipakuqpaqqa ama pay contra mana allinkunata yuyaykuychu. 30Ama pitapas yanqapuniqa quejaychu, manataq pipas mana allinta ruwashasuqtiykiqa. 31Ama envidiakuychu runa maqaq runata, amataq imaynatachus kawsasqanta hinaqa kawsaychu. 32Señor Diosqa waqllisqa runakunatan millakun, chanin runakunawantaq sonqota tupachin. 33Señor Diosqa millay runaq wasintan ñakan, chanin runaq familiantataq saminchan. 34Señor Diosqa burlakunmi burlakuqkunamanta, k'umuykukuqkunatan ichaqa sumaqta qhawarin. 35Señor Diosmi yachayniyoqkunata hatunchan, mana yuyayniyoqkunatataq p'enqachin.

will be added

X\