Proverbios 29

1Askha kuti anyaykusqa k'ulluchakuq runaqa qonqayllan manaña sayariq urmaykachisqa kanqa. 2Chanin runakuna askhayanku chayqa, llapallan kusikunku, millay runakuna kamachikuqtinmi llaqtaqa khuyayta anchin. 3Yachayniyoq-kayta munakuqqa taytantan kusichin, rabona warmikunaqta puripayaqmi ichaqa kaqninkunata usuchin. 4Chaninta kamachikuq reyqa suyuntan allinta takyachin, impuestokunallata sik'iqmi ichaqa chay suyunta waqllichin. 5Runamasinta llunk'upayaqqa toqllatan purinanpi churashan. 6Millay runataqa huchankunallataqmi mayt'uykun, chanin runan ichaqa kusisqa takin. 7Chanin runaqa wakchakunapaq chaninchapunatan munan, millay runamanmi ichaqa chaykunamanta mana imapas qokunchu. 8Anchaykachaqkunaqa llaqtatan ch'aqwachinku, yachayniyoqkunan ichaqa k'arak phiñakuyta thasnunku. 9Yachayniyoq runachus mana yuyayniyoq runawan quejanakunqa chayqa, chaypin mana yuyayniyoqqa phiñakunqa asipayanqa, manataqmi allipunanqakuchu. 10Runa wañuchiqkunaqa allin kawsaq runakunatan cheqnikun, chanin runakunatataqmi wañuchinapaq maskhanku. 11Mana yuyayniyoqqa manchana k'araktan phiñakun, yachayniyoq runan ichaqa sonqollanpi hap'ispa thasnun. 12Huk kamachikuqchus llullakusqata chaskin chayqa, llapa oficialninkunan millaykama kapunqaku. 13Wakchawan sarunchaqwanqa kasqankaman, Señor Diosmi rikuq ñawita iskayninkuman qon. 14Wakchakunapaq allinta chaninchapuq reyqa unaytapunin kamachikunqa. 15Wanaykachiyqa anyaykuyqa wawatan yachachin, ima munasqanta ruwananpaq hinallata qhawasqa wawan ichaqa mamanta p'enqachin. 16Millay runakunachus askhayanku chayqa, askhayaykunmi huchallikusqakunaqa, chanin runakunan ichaqa paykunaq urmaykusqanta rikunqa. 17Wawaykita wanachiy, manan umaykita nanachisunkichu, aswanpas anchatapunin payqa kusichisunki. 18Maypichus Diospa siminta mana yachachikunchu, chay llaqtaqa munayllanmanmi kawsan, Diospa kamachikuy siminta hunt'aq llaqtan ichaqa kusisamiyoq. 19Kamachiqa manan simillawanchu wanan, entiendenña chaypas, manan kasukunchu. 20¿Rikurqankichu hawan-ukhun rimaq runata? Mana yuyayniyoq runamantan aswan suyakuy kan, manataq hawan-ukhun rimaq runamantaqa. 21Warmanmanta luylusqayki kamachiqa qhepamanmi umaykita nanachisunki. 22Saltaq sonqo runaqa ch'aqwatan sayarichin, k'arak phiñakuqqa huchallikushallanmi. 23Runataqa anchaykachayninmi k'umuykachin, huch'uyyaykukuq sonqoyoqmi ichaqa hatunchasqa. 24Suwawan suwaysikuqqa pay kikintan cheqnikun, juzganapi suwachikuq ñakashaqtinpas manchakuymantan mana imatapas rimarinchu. 25Runakunata manchapakuyqa huk toqllan, Señor Diosman hap'ipakuqmi ichaqa waqaychasqa kashan. 26Askhan kamachikuqpa allin qhawarisqan kayta munanku, ichaqa Señor Diosllan sapanka runapaq chaninchaqqa, 27Chanin runakunaqa millaykaqta ruwaqkunatan millakunku, millay runakunapas chanin kawsaqkunatan millakunku.

will be added

X\