Proverbios 28

1Millay runaqa mana piqpa qatiykachasqanmi ayqen, chanin runan ichaqa león hina mana manchakunchu. 2Huk suyupi ch'aqwaylla kaqtinqa kamachikuqkunan askhayan, yuyayniyoq yachayniyoq kamachikuqtinmi ichaqa suyuqa allinta takyan. 3Wakchakunata sarunchaq kamachikuq runaqa, chakrakunata apaq lloqlla para hinan. 4Kamachikuy simita saqepuqkunaqa millay runakunatan hatunchanku, kamachikuy simita waqaychaqkunan ichaqa millay runakuna contra sayarinku. 5Millay runakunaqa manan chaninchayta entiendenkuchu, Señor Diosta yupaychaqkunan ichaqa chaninchayta llapanta entiendenku. 6Chaninta puriq wakcha runan aswan allinqa, waqllisqa kawsaq qhapaqmantaqa. 7Diospa kamachikusqan simita hunt'aqqa allin reparaq churin, rakrapukunaq mikhuqmasinmi ichaqa taytanta p'enqachin. 8Qolqeq interesninta chaskispa qhapaq kaykunata huñuqqa, wakchakunata llakipayaqpaqmi huñun. 9Pipas kamachikuy simita uyariyta mana munanchu chayqa, Diospas mañakusqantaqa millakullantaqmi. 10Chanin runakunata mana allin ñanman pantaykachiqqa, pay kikinpa t'oqosqallanmantaqmi urmaykunqa, mana huchachana runakunan ichaqa allinkaqta chaskinqaku. 11Qhapaq runaqa kikinpa yuyaykusqanpin yachaysapa, allin reparaq wakcha runan ichaqa mana hinachu kasqanta sut'inchan. 12Chanin runakuna atipaqtinkuqa, anchatan kusikunku, millay runakuna kamachikuqtinkun ichaqa llapalla pakakunku. 13Huchankunata pakaykuqqa manan allinyanqachu, huchankunata willakuspa saqepuqmi ichaqa khuyapayasqa kanqa. 14Kusisamiyoqmi Señor Diosta manchakuqllapuni runaqa, sonqonta rumiyachiqmi ichaqa mana allinman urmaykunqa. 15Qapariq león hinan, phawaykuq ukumari hinan wakcha llaqtata kamachiq millay runaqa. 16Mana tanteaspa kamachikuqqa anchatan runata sarunchan, mana chanin ruwaywan qhapaqyayta cheqnikuqmi ichaqa unayta kawsanqa. 17Runa wañuchiq hucha q'epiqa aya p'ampanaman haykunankaman ayqenqa, ama pipas paytaqa hark'achunchu. 18Chaninpi puriqqa qespichisqan kanqa, waqllisqa kawsaypi puriqmi ichaqa qonqaylla urmaykapunqa. 19Chakranta llank'aqqa askha mikhunayoqmi, qellakunawan puriqmi ichaqa wakchayaykapun. 20Hunt'aq runaqa askha saminchayoqmi kanqa, usqhayllaman qhapaqyaqmi ichaqa huchachasqapuni kanqa. 21Runaman sayapakuyqa manan allinchu, huk khamuykuy t'antaraykupas runaqa huchallikunmanmi. 22Mich'a runaqa usqhayllatan qhapaqyan, manataqmi yachanchu wakchayay payman chayamunanta. 23Runata anyaykuqmi llunk'upayaqmantaqa aswan allin qhawarisqa qhepaman kanqa. 24Tayta-mamanmanta suwakushaspa “manan chayqa huchachu” niqqa runa q'aruqpa amigonmi. 25Imaymanayoq kayta munaqqa ch'aqwaykunatan sayarichin, Señor Diosman hap'ipakuqmi ichaqa allinyanqa. 26Yuyaykusqallanman hap'ipakuqqa mana yuyayniyoqmi, yachaywan ruwaqmi ichaqa allillanpuni kanqa. 27Wakcha runaman qoykuqqa manan wakchayanqachu, mana qoykuqmi ichaqa sinchi ñakasqa kanqa. 28Millay runakuna kamachikuqtinqa llapallan pakakunku, chinkapuqtinkun ichaqa chanin runakuna askhayanku.

will be added

X\