Proverbios 27

1Ama paqarin p'unchay imachus ruwanaykimanta alabakuychu, manan yachankichu imachus chay p'unchaypi kananta. 2Ama qan kikiyki hatunchakuychu, hukkunan hatunchanasuykiqa, manan allinchu qan kikiykiq hatunchakuyniykiqa. 3Llasan rumiqa, llasallataqmi aqopas, mana yuyayniyoq runaq phiñachisqanmi ichaqa aswan llasaraq. 4Sinchi millaymi phiñakuyqa, phoqchiq unu hinan k'arak phiñakuyqa, envidiakuymi ichaqa mana sayachiy atiy. 5Aswan allinmi sut'ita phiñariyqa, munakuspa mana ima nispapas niymantaqa. 6Amigoqa munakuspan nanaqta k'amiykusunki, awqayki much'aykuqtinmi ichaqa cuidakunki. 7Saksasqa runaqa manan miel misk'itaqa munanchu, yarqasqapaqmi ichaqa llapa hayapas misk'i. 8Imaynan phalaq animalpas q'esanta saqepun, chay hinan wasinta saqepuq runaqa. 9Q'apaq hawinapas inciensopas sonqotan kusichin, amigoq allin yuyaychasqanqa runatan kallpachan. 10Amapuni amigoykitaqa saqeychu, amallataq taytaykiq amigontapas. Llaki-phutiypi kasqayki p'unchaypiqa ama wawqeykiq wasinta riychu, aswan allinmi sispa wasimasiman riyqa karupi kashaq wawqeqta riymantaqa. 11Churilláy, yachayniyoq kay, hinaspa sonqoyta kusirichiway, chaymi k'amiwaqniyman kutichisaq. 12Yuyayniyoqqa mana allin kaqtan reparan hinaspan pakakun, pisi yuyayniyoqkunan ichaqa pasallanku hinaspan k'irisqa rikukapunku. 13Wak llaqtayoq runapaq fiakuqpa p'achanta chaskiy, wasanchaq warmipaq fiakuqpa p'acha prendanta waqaychay. 14Tutallamanta runamasinta kunkayoqta napaykuqqa ñakanmanpas hinapaq hap'isqan kanqa. 15Paray tiempopi mana thanispa sut'uq hinan ch'aqwaylla-ch'aqwaq warmiqa, 16payta upallachiyqa wayrata sayachiy munay hinan, aceiteta paña makipi hap'iykuyta munay hinan. 17Fierrotaqa fierrowanmi filochanku, chay hinatan runataqa runamasin allinyachin. 18Higos sach'ata cuidaqqa rurusqantan mikhunqa, patronninta cuidaqpas hatunchasqan kanqa. 19Imaynan uyaqa unupi rikhurin, chay hinan runaq sonqonpas paypa imaynachus kasqanta rikhurichin. 20Wañuy-pachawan Ukhu-pachawanqa manan hayk'aqpas saksanchu, chay hinan runaq ñawinpas munapakushallanpuni. 21Crisolpin qolqetaqa ch'uyayachinku, hornopin qoritaqa ch'uyayachinku, runataq hukkunaq hatunchasqanwan reqsichikun. 22Trigo ch'aqesqa ukhupi huk tunawawanña mana yuyayniyoqta maranpi kutawaq chaypas, manapunin mana yuyayniyoq-kayninqa paymanta lloqsinqachu. 23Allintapuni yachay ovejaykikunaq imaynachus kashasqantaqa, makilla qhaway oveja t'aqaykikunata. 24Qhapaq kaykunapas manan wiñaypaqchu sayan, coronapas manan wiñaypaqchu kashan. 25Ichhusqa q'achu ch'ikchimuqtinqa, orqokunapi kaq q'achupas q'achusqa kaqtinqa, 26borregoykikunan p'achaykipaq millmata qosunki, orqo cabraykikunan qolqechasqaqa chakra rantinaykipaq kanqa, 27cabraykikunaqa askha lechetan qosunki qanpa ukyanaykipaq, familiaykiq ukyananpaq, warmi kamachiykikunaq ukyananpaqwan.

will be added

X\