Proverbios 26

1Imaynan ruphay mitapi rit'iqa mana allinchu, cosecha ukhupi parapas mana allinchu, chay hinan mana yuyayniyoqpaqqa hatunchasqa-kay mana allinchu. 2Imaynan pichitankaqa muyuspa phalashallan khallwapas muyushallan, chay hinan yanqa-qasi ñakaypas mana pimanpas chayanchu. 3Caballopaqmi soq'anaqa, asnopaqmi waskhaqa, mana yuyayniyoqkunapaqtaq hasut'ipas. 4Ama hayk'aqpas mana yuyayniyoqmanqa kutichiychu mana yuyayniyoq-kayninman hinaqa, ama qanpas pay hina kanaykipaq. 5Mana yuyayniyoqmanqa mana yuyayniyoq kasqanman hina kutichiy, ama yuyaykusqanpi “yachayniyoqmi kani” ninanpaq. 6Mana yuyayniyoqman willakuy apachiyqa chakita q'allakuy hinan, sasapi rikukuy hinan. 7Wist'uq chakinqa yanqan warkurayan, chay hinan mana yuyayniyoqpa siminpi rikch'anachiy simiqa. 8Mana yuyayniyoqta hatunchayqa warak'api rumita watay hinan. 9Imaynan machasqaqa makinpi khiskata mana reparanchu, chay hinan mana yuyayniyoqpa siminpi rikch'anachiy simiqa. 10Imaynan wach'inawan wach'iqqa pitapas k'irin, ahinan mana yuyayniyoqtapas mayqen purikuqtapas llank'ananpaq mink'akuqqa. 11Imaynan alqoqa aqtumusqanta wakmanta mikhukapun, ahinan mana allin yuyaywan ruwasqanta huktawan ruwaqqa. 12¿Rikurqankichu yachaysapaman tukuq runata? Mana yuyayniyoqmantan aswan suyakuyqa kan, chay yachaysapaman tukuq runamantaqa. 13Mana llank'ananraykun qellaqa nin: ¡Leonmi ñanpi kashan! ¡Leonmi callepi kashan! nispa. 14Imaynan punkuqa muyunankunapi muyun, chay hinan qellaqa puñunanmanta mana lloqsinchu. 15Qellaqa p'ukumanmi makinta challpuykun, makinmi utin siminman apananpaq. 16Qellaqa ninmi: Allin kutichiyta yachaq qanchis runamantapas aswan yachayniyoqmi kani, nispa. 17Hukpa ch'aqwasqanman chapukuqqa alqota ninrinkunamanta hap'irqoq hinan. 18Imaynan waq'ayasqaqa wañuchinapaq rawrashaq wach'inakunata wach'in, 19chay hinan qharimasinta, “yanqallan chaytaqa nirqayki”, nispa q'otuq runaqa. 20Mana llant'awanqa ninaqa wañunmi, maypichus simi apaqpa mana kasqanpin ch'aqwaypas ch'inyapun. 21K'illimsaqa sansapaqmi, llant'apas ninapaqmi, ch'aqwaylla-ch'aqwaq runataqmi ch'aqwata sayarichinanpaq. 22Simi apaqpa siminkunaqa misk'illaña mikhuna hinan, sonqo ukhukamataqmi haykunpas. 23K'arpa manka pataman lozawan llusisqa hinan millay yuyaywan misk'i simikunata rimaq runaqa. 24Cheqnipakuqqa manan cheqnipakuq hinachu riman, sonqon ukhupin ichaqa millaykunata yuyaykun. 25Sumaqtachus rimapayasunki chayqa, aman payta creenkichu, sonqonqa millaywan hunt'allañan kashan. 26Cheqnikuynintaña llullakuspa pakaykunqa chaypas, millay kayninqa llapa runa qayllapin rikhurichisqa kanqa. 27T'oqota hasp'iqqa chaymanmi urmaykunqa, pipas rumita tanqanqa chayqa, payllamantaqmi urmaykunqa. 28Llullaqa k'irisqan runakunatan cheqnikun, llunk'upayaq simiqa waqllichinmi.

will be added

X\