1 Kaykunapas Salomonpa rikch'anachiy siminkunaraqmi, Judá suyupi rey Ezequiaspa runankunaq qelqasqata copiasqanku. 2 Diospa imatapas pakasqanmantaqa paytan yupaychana, reykunaq imatapas t'aqwisqanmantaqa paykunatan hatunchana. 3 Hanaq pachaq alto-kaynintawanqa, hallp'a pachaq ukhu-kaynintawanqa, reykunaq sonqontawanqa manan t'aqwiyta atikunchu. 4 Qolqemanta qhoqayasqanta horqoy, hinan unuyachiqqa qolqe vasota ruwanqa. 5 Reypa qayllanmanta millay runata t'aqay, chaymi kamachikuyninqa chaninpi allinta takyanqa. 6 Reypa qayllanpiqa ama hatunchakuychu, hatunkunaq kasqanpipas amallataq kaychu. 7 Aswan allinmi: Kayman hamuy, nispa ninasuyki, umalli runaq qayllanpi k'umuykachisqa kanaykimantaqa. Ñawiykiq rikusqantaqa 8 ama juzganaman usqhaylla phawachiychu, paqtan hukkaq testigo llullapaq hap'ichisunkiman, hinan qhepaman mana ima ruwaytapas atiwaqchu. 9 Runamasiykiq ch'atasqasuykimantaqa qanlla tupapakuy, hukpa willaykukusqantan ichaqa ama rimarinkichu. 10 Paqtan uyariqniyki p'enqachisunkiman, hinaspa p'enqachisqa kasqayki mana chinkapunmanñachu. 11 Qolqepi ch'olqochisqa qori manzana hinan tiemponpipuni rimasqa simiqa. 12 Qori anillo hinan, ch'uya qori walqana hinan kasukuq runata yachayniyoqpa anyaykusqanqa. 13 Imaynan cosecha q'oñi p'unchaykunapi khutu unuqa allin, ahinan kachaqninpaq hunt'aq willaqqa, patronnintan kallpachaykun. 14 Imaynan mana parayoq phuyupas wayrapas, chay hinan mana imallantapas qoykushaspa yanqalla alabakuq runaqa. 15 Pacienciawanmi kamachikuqtaqa uyachina, llamp'u simitaqmi mana kuyuriq sonqota kuyurichin. 16 Miel misk'itachus tarinki chayqa, tupusqallata mikhuy, paqtan askhata mikhuspaykiqa aqtumuwaq. 17 Ama wasimasiykiq wasinta sinchita puripayaychu, paqtan qanwan amikuspa cheqnikusunkiman. 18 Maqana, espada, ñawch'isapa wach'ina hinan runamasinta yanqa tumpaq runaqa. 19 Hut'usqa kiru hinan, wist'u chaki hinan llaki-phutiy p'unchaypi mana simin hunt'aq runaman hap'ipakuyqa. 20 Llakisqa sonqoyoqpaq takipuqqa chiri p'unchaypi p'achanta llat'aq hinan, otaq lleqthi k'iriman kachi unuta hich'aykuq hinan. 21 Awqaykichus yarqachikunqa chayqa, mikhuchiy, ch'akichikunqataqchus chayqa, ukyachiy, 22 chay hinapin awqaykiq uyanqa p'enqakuymanta pukamanraq tukunqa, Señor Diostaq chaymanta kutichipusunki. 23 Imaynan paraqa wayrawan chayamun, chay hinan qhepapi runamanta rimasqakunaqa runata phiñachin. 24 Aswan allinmi wasi pata k'uchullapi tiyaykuy ch'aqwaylla-ch'aqwaq warmiwan hatun wasipi tiyaymantaqa. 25 Imaynan chiri unupas ch'akichikuqta thasnun, chay hinan karu suyumanta chayamuq sumaq willakuykunaqa. 26 Imaynan qonchu pukyupas qhellichasqa p'uytupas, chay hinan millay runawan mana churanakuy munaq chanin runaqa. 27 Manan allinchu askha miel misk'ita mikhuyqa, manallataqmi allinchu astawan hatunchasqa-kayta munayqa. 28 Thunisqa mana perqayoq llaqta hinan pay kikinta mana cuidakuy yachaq runaqa.
