Proverbios 23

1Allin wiraqochawan mikhuq tiyaykuspaykiqa, allinta yuyaykuy pichus ñawpaqeykipi kashasqanta. 2Sinchitachus mikhunayachikunki chayqa, thoqayllaykita millp'uykukuy. 3Ama munapakuychu sumaq mikhunankunata, paqtan payqa q'otushallasunkiman. 4Qhapaqyanaykipaq ama afanakuychu, chaymanta waqaychakunaykipaq yuyayniyoq kay. 5Huk ratollan chaytaqa qhawarinki, manataq kapunchu, chaykunaqa ankakuna hinan raphrachakun, hinaspa phalaripun. 6Ama mich'a runawanqa mikhuq tiyaykuychu, ama sumaq mikhunankunatapas munapakuychu. 7Payqa imayna mikhunaykitapas yuyayninpin tupushan, payña: ¡Mikhuy! ¡Ukyay! nispa nisunki chaypas simillanmi chaytaqa riman. 8Mikhusqaykitan aqtumunki, sumaq rimasqaykikunapas yanqapaqmi kanqa. 9Ama mana yuyayniyoqtaqa rimapayaychu, allin yachaywan rimasqaykikunatan pisicharparinqa. 10Aman ñawpa qorpa rumi churasqataqa kuyurichinkichu, aman mana tayta-mamayoqkunaq chakranmanpas suchuykunkichu, 11paykunata amachaqqa Atiyniyoq Diosmi, paymi mana tayta-mamayoqkunata amachaspa qan contra sayarinqa. 12Yachachikuyman sonqollikuy, yachayniyoq simikunatapas maki uyariy. 13Wawachus wanachinapaq kaqtinqa, payta wanachiy, hasut'isqaykiwanqa manan wañunqachu. 14Waqtaykunkichus chayqa, Wañuy-pachamantan karunchanki. 15Churilláy, yachayniyoqchus kapunki chayqa, sonqoytapas kusichillawankitaqmi, 16anchatan kusikusaq chanin rimasqaykikunata uyarispa. 17Ama huchasapakunata envidiakuychu, aswanpas Señor Diosta manchakushallaypuni. 18Qanpaqqa kashanraqmi qhepa p'unchay, suyakuyniykiqa manan qollupunqachu. 19Churilláy, maki uyariy, yachayniyoq kay, allin ñanllatapuni puriy. 20Ama machaqkunawanqa huñukuychu, amallataq rakrapukunawanpas huñukuychu, 21machaqkunapas rakrapukunapas wakchayapunkun, puñuylla-puñuqpas thanta p'achayoqmi kapunqa. 22Uyariy churiyaqniyki taytaykita, payayapuqtinqa ama mamaykita qhawarpariychu. 23Cheqaq-kayta rantiy, amataq chayta vendeychu, tarillaytaq yachaytapas, tupusqalla-kaytapas, yuyayniyoq-kaytapas. 24Anchatan chanin runaq taytanqa kusikun, yachayniyoqta churiyaqqa paywanmi q'ochukun. 25Taytaykipas mamaykipas kusikuchun, wachaqniykipas q'ochukuchun. 26Churilláy, tukuy sonqoykiwan uyariway, imayna kawsasqaytapas allinta qhawariy. 27Chinkaykuq ukhu p'uytun rabona warmiqa, k'ikllu p'uyunkun wasanchaq warmiqa. 28Paypas suwa hinan qhamiyan, askha qharikunatan wasanchaspa huchallichin. 29¿Pipaqmi muchuyqa? ¿Pipaqmi nanayqa? ¿Pipaqmi ch'aqwaykunapas waqaykunapas? ¿Pipaqmi yanqa-qasilla k'irisqakunaqa? ¿Pipaqmi pukayasqa ñawikunaqa? 30Vinota mana hayk'aq kachariqkunapaqmi, tupachisqa machana ukyanata maskhaqkunapaqmi. 31Ama vinota munapakuychu pukayashaqtinqa, vasopi colornin k'ancharishaqtinqa, llamp'ulla millp'uykuchikushaqtinqa. 32Chaymantañan ichaqa mach'aqway hina k'utun, víbora hina kanin. 33Ñawiykiqa mana rikusqankunatan qhawarinqa, yuyaykunkipas rimankipas waqllisqakunatan. 34Lamar-qocha ukhupipas puñushawaq hinan kanki, otaq barcopi hatunkaray k'aspi puntapipas puñushawaq hina. 35Ninkitaqmi: Maqawasqakun, ichaqa manan nanawanchu, soq'aykuwasqakun, ichaqa manan repararqanichu. ¿Hayk'aqmi rikch'arisaq astawan vinota ukyanaypaq? nispa.

will be added

X\