Proverbios 22

1Mentasqa-kayqa askha qhapaq kaykunamantapas aswan chaniyoqmi, sumaq rikusqa kaypas aswanraqmi qori-qolqemantapas. 2Qhapaqtapas wakchatapas Señor Diosmi kamarqan, chay hinapin kaqkama kanku. 3Yuyayniyoqqa mana allin kaqtan reparan hinaspan pakakun, pisi yuyayniyoqkunan ichaqa pasallanku hinaspan k'irisqa rikukapunku. 4Huch'uyyaykukuqqa Señor Diostapas manchakuqqa qhapaq kayta, hatunchasqa-kayta, unay kawsaytawanmi tarinqa. 5Millay runaq ñanninpiqa khiskakunan toqllakunan kashan, pipas kawsayninta waqaychakuqqa chaykunamantan karunchakun. 6Wawata yachachiy imaynatachus kawsananpaq, machuyapuspapas manapunin chaytaqa qonqanqachu. 7Qhapaqqa wakchakunatan kamachin, manuqpas manukuqninkunatan kamachin. 8Runata sarunchaqqa llakitan muchunqa, k'arak ñak'arichiyninqa chinkapunqan. 9Hukkunata sumaqta rikuqqa saminchasqan kanqa, wakcha runaman mikhunata haywarisqanrayku. 10Uma hoqariqta qarqoy, hinan ch'aqwaypas chinkapunqa, phiñanakuypas k'aminakuypas manañan kanqañachu. 11Pipas ch'uya sonqo-kayta munan, sumaqtataq rimanpas chayqa, chaywanmi reyqa amigota ruwanqa. 12Señor Diosqa cheqaq-kaytan makilla waqaychan, llullaq rimasqantan ichaqa qolluchin. 13Qellaqa ninmi: Leonmi hawapi kashan, callepin mikhurpariwanqa, nispa. 14Wasanchaq warmiq siminqa chinkay-chinkay ukhu t'oqon, Señor Diospa ñakasqankunan chaymanqa urmaykun. 15Loqhe-kayqa waynaq sonqonpin saphichakun, ichaqa wanaykachiywanmi chayqa chinkapun. 16Qhapaqyananpaq wakcha runakunata sarunchakuqpas, qhapaqman sumaq sonqota haywariqpas wakchayanqakun. 17Maki uyariy yachayniyoqkunaq siminta, yachachikuyniyman sonqollikuy. 18Chaykunatachus sonqoykipi hap'inki, simillaykipiñataq rimarinaykipaq kanqapas chayqa, kusikunaykipaqmi kanqa. 19Kunanmi chaykunata yachachiyki Señor Diosman hap'ipakunaykipaq. 20Ñoqan kinsa chunka t'aqa rimayta qelqapurqayki, chaykunan kunaykuykuna yachaykuna kashan, 21cheqaqllaña simikunata qanman yachachinaypaq, kachamuqniykiman cheqaq willakuyta willanaykipaq. 22Ama wakcha runamanta qechuychu wakcha kasqanrayku, amallataq mana imayoqkunatapas juezkunaq qayllanpiqa muchuchiychu, 23Señor Diosmi paykunamantaqa sayarinqa, qechuqninkuq kawsaynintapas paymi qechunqa. 24Ama phiñakuylla-phiñakuq runawanqa reqsinakuychu, ama saltaq sonqo runawanpas huñukuychu, 25paqtan imaynatachus kawsasqanta yachaqakuwaq, hinaspa qan kikiykita seq'okuwaq. 26Ama fiakunaykipaq prometekuychu, amataq manukuqpaq fiakuqpaschu kay, 27manataq paganaykipaq kanchu chayqa puñunaykitawanpas qechuchikunkin. 28Aman ñawpa taytaykikunaq churasqan qorpa rumikunataqa suchuykuchinkichu. 29¿Allin llank'aq k'uchi runata rikunkichu? Payqa reykunaq kamachinmi kanqa, manataq pisipaq qhawasqa runakunaq kamachinchu kanqa.

will be added

X\