1 Yarqha unuta hinan Señor Diosqa reypa yuyayninta pusan, maymanchus munasqanmanmi purichin. 2 Runapaqqa tukuy ima ruwasqanpas allinmanmi rikch'akun, Señor Diosmi ichaqa yuyaykusqakunata tupun. 3 Chaninkaqtawan kuskachaytawan ruway, chaykunaqa Señor Diospa aswan sumaq qhawarisqanmi sacrificasqakunamantaqa. 4 Hatunmanta qhawaykuqpas anchaykachaq sonqopas millay runakunatan pusan, chayqa huchan. 5 K'uchi runaq yuyaykusqankunaqa allinmankaman tukun, usqhayllata qhapaqyayta munaqtaqmi wakchayapun. 6 Llullakuspa qhapaq kaykunata tariyqa toqllapi wañuqkunaq chinkapuq samaynin hinan. 7 Millay runakunaq maqakuq-kayninkuqa paykunallatataqmi wañuchinqa, manapunin maychus chaninkaqtaqa ruwayta munankuchu. 8 Hucha q'epi runaq kawsasqanqa q'ewisqan, ch'uya runaq ruwasqankunan ichaqa cheqankama. 9 Aswan allinqa wasi pata k'uchupi tiyakuymi ch'aqwaylla-ch'aqwaq warmiwan hatun wasipi tiyaymantaqa. 10 Millay runaqa mana allinllatapunin munan, manapunin runamasintaqa khuyapayanchu. 11 Uma hoqariq runa muchuchisqa kaqtinqa, pisi yuyayniyoqmi yachaqakun, yachayniyoq runaqa pisi yachachisqallawanmi astawanraq yachaqakun. 12 Chanin Diosqa millay runaq wasin imaynachus kasqantan qhawan, paykunataqa waqlliymanmi qaraykun. 13 Pipas wakchaq mañakusqanta mana uyarinchu chayqa, paypa mañakusqanpas manallataqmi uyarisqachu kanqa. 14 Pakallapi sumaq sonqo qoykusqaqa phiñakuytan thasnun, lluk'iykuyta haywasqapas k'arak phiñakuytan tiyaykachin. 15 Chanin juzgay kaqtinqa chanin runakunan kusikunku, mana allinkaqta ruwaqkunan ichaqa anchata mancharikunku. 16 Yachay ñanmanta t'aqakuqqa wañusqakunaq huñunakusqan ukhupin rikhurinqa. 17 Aycha kusichiyman sonqollikuq runaqa wakchan kanqa, sumaq mikhuyllata mikhuqqa manapunin qhapaqyanqachu. 18 Chanin runaq muchunantaqa millay runan muchunqa, allin runakunaq rantinpiqa huchallikuq runan muchunqa. 19 Ch'usaq cheqaspi tiyakuymi aswan allinqa, ch'aqwaylla-ch'aqwaq phiñakuylla-phiñakuq warmiwan tiyaymantaqa. 20 Chaniyoq illakunan q'apaq hawinakunan yachayniyoqpa wasinpiqa kashan, mana yuyayniyoq runan ichaqa tukuy kaqninta q'aruykapun. 21 Chanin-kayta munakuytawan maskhaqqa unaytan kawsanqa, hukkunapas chanintan sumaqtan rikunqaku. 22 Yachayniyoq runan allin hark'asqa llaqtaman phawaykun, chay llaqtaq confiakusqan pukaratataq thunin. 23 Simintapas qalluntapas watakuqqa manan ima llaki-phutiypipas rikukunchu. 24 Hatunchakuqtaqa anchaykachaqtaqa “uma hoqariq” ninkun, sinchi uma hoqariq kaspanmi chay hinata kawsan. 25 Qellataqa munapakuyninmi wañuchin, makinwan mana llank'ayta munasqanrayku. 26 P'unchay ch'isiyaqmi munapakun, chanin runan ichaqa mana mich'akuspa qon. 27 Millay runakunaq sacrificio haywasqanqa millakuymi, millayta yuyaykuspa chayta haywaqtinkuqa aswan millakuymi. 28 Llulla testigoqa wañunqan, pipas uyariyta yachaqmi ichaqa rimayta atillanpuni. 29 Millay runaqa mana reparachikuq hinallan purin, chanin runan ichaqa imaynatachus kawsasqanta allinta yuyan. 30 Manan yachaypas, yuyaypas, yuyaychaypas Señor Diospa ñawpaqenpiqa valenchu. 31 Runaqa awqa-tinkunapaqmi caballota wakichikun, ichaqa Señor Diosllan atipachiqqa.
