Proverbios 20

1Vinoqa runatan anchaykachachin, poqosqa ukyanaqa ch'aqwachinmi, chaywan machaqqa mana yachayniyoqmi. 2Leonpa qaparisqan hinan reypa phiñakusqanqa, pipas phiñachiqqa pay kikintan k'irikun. 3Ch'aqwayta mana munaq runaqa hatunchasqan, pipas mana yuyayniyoqmi ichaqa ch'aqwata sayarichishallan. 4Qellaqa yapuna p'unchaykunan mana yapunchu, chakran cosechaq rispataqmi mana imatapas tarinchu. 5Chinkay-chinkay ukhu unu hinan sonqollapi yuyaykusqakunaqa, yuyayniyoq runan ichaqa chaykunata sut'iman horqoyta yachan. 6Askha runan hunt'aq kasqankuta willakunku, cheqaq hunt'aq runataqa, ¿pitaq tarinqa? 7Chanin runaqa chanin-kayninpi purin chayqa wawankunapas kusisamiyoqmi. 8Reyqa juzganapi tiyaykuspanmi qhawarispalla llapa mana allinta suysun. 9¿Pitaq ninman: Ñoqan sonqoyta ch'uyayachini, ch'uyan huchaymanta kashani, nispa? 10Mana chanin romanatapas mana cabal tupunatapas iskaynintan Señor Diosqa cheqnikun. 11Waynapas ruwasqankunawanmi reqsisqa kanqa, kawsayninpin rikukun ch'uyachus cheqanchus kasqanqa. 12Uyariq ninritapas qhawaq ñawitapas iskaynintan Señor Diosqa kamarqan. 13Ama puñuylla puñuqchu kay, paqtan wakchayawaq, rikch'ashallaypuni, saksa mikhusqan kanki. 14Rantiqqa ninmi: Manan allinchu, manan allinchu, nispa, rantispanñan ichaqa alabakun. 15Kanmi valorniyoq qoripas askha umiñakunapas, chaykunamantapas aswan valorniyoq illa hinan yachaywan rimayqa. 16Wak llaqtayoqpaq fiakuqpa p'achanta chaskiy, karu llaqtayoqpaq fiakuqmanta p'acha prendanta waqaychay. 17Runapaqqa misk'in suwasqa mikhuyta mikhuyqa, chay qhepatan ichaqa chhanqa aqotapas mikhushanman hina kanqa. 18Imatapas ruwanaykipaqqa yuyaychachikuyraq, awqa-tinkunaykipaqqa allintaraq yuyaykuy. 19Simi apaqa sonqollapi pakasqatan rikhurichin, ama huñukuychu simita kacharispa rimaqwanqa. 20Taytantapas mamantapas ñakaqqa sinchi laqhayaqpin wañunqa. 21Qallariypi mana sasawan tarisqaqa, manan qhepamanqa kusikunapaqchu kanqa. 22Ama niychu: Ñoqan vengakusaq nispaykiqa, Señor Diosta suyakuy, paymi chaninchapusunki. 23Señor Diosqa cheqnikunmi waqllisqa pesakunata, mana chanin balanzakunaqa manan allinchu. 24Señor Diosmi runataqa maymanpas purichin, manan pipas yachakunchu maymanchus purishasqantaqa. 25Runapaqqa toqlla hinan hawan-ukhunta Diosman prometekuyqa, chay qhepatataq prometekusqanmanta ñakapakunman chayqa. 26Yachayniyoq reyqa millay runakunatan wayrachin, hinaspan paykunata saruchin. 27Señor Diospa qosqan espiritun runaq yuyayninqa, chaymi lámpara hina sonqo ukhukamaraq k'anchaykun. 28Reyqa munakuq kaspan, hunt'aq kaspan, waqaychasqa kanqa, reyqa khuyallikuq kaqtinmi, kamachikuyninpas qaqata sayanqa. 29Waynakunaq sumaq-kayninqa kallpankun, yuyaq runakunaq sumaq-kaynintaqmi yuraq umanku. 30K'irisqakunan, soq'aykusqakunan millay-kayta chinkachin, hasut'iykusqakunaqa sonqo ukhutan ch'uyanchan.

will be added

X\