Proverbios 2

1Churilláy, simiykunata hap'ikuy, kamachikusqaykunatapas sonqoykipi waqaychay. 2Yachayta makilla uyariy, allin yuyayman sonqollikuy, 3allin reparayta chaskinaykipaq mañakuy, allin yuyayta tarinaykipaqpas waqyakuy, 4qolqeta hina maskhay, chaniyoq pakasqa illakunata hina t'aqwiy. 5Chaymi Señor Dios manchakuyta yachanki, paytapas reqsinki. 6Señor Diosmi yachayta qoqqa, paypa siminmantan paqarimun, yachaypas, allin yuyayniyoq-kaypas. 7Señor Diosmi chanin runakunata yanapaykun atipanankupaq, chanin kawsaqkunatan amachaykun. 8Señor Diosmi runamasinkupaq chaninkaqta ruwaqkunata waqaychan, payman sonqollikuqkunatapas hark'aykun. 9Chaypachan entiendenki imaynatachus allinta kawsanaykipaq, entiendellankitaq imachus chanin-kayta, chaninchayta, k'apak-kaytapas. 10Chaymi yachayniyoq kanki, reqsiywanpas misk'illikunki, 11chaypachan allin reparayqa waqaychasunki, allin yuyaypas makilla cuidasunki. 12Yachaymi millay ñanmanta karunchasunki, waqllisqakunata yuyaykuq runakunamanta qespichisunki. 13Yachaymi allin ñanta saqepuqkunamanta karunchasunki, tutayaq ñankunanta puriqkunamanta qespichisunki, 14millaykaqta ruwaspa kusikuqkunamantapas karunchasunki, waqllispa viciopi kusikuqkunamantapas qespichisunki. 15Chay runakunaqa waqlliypin kawsanku, kawsayninkuqa q'ewisqallapunin. 16Yachayqa wasanchaq warmimantapas karunchasunkin, wayllupayaspa rimaq wak warmimantapas hark'aykusunkin. 17Paymi sipas kasqan qosanta wikch'upun, Diosninpa qayllanpi rimanakusqantapas qonqapun. 18Wasinman riyqa wañuyman riy hinan, payman qayllaykuyqa wañusqakunaman qayllaykuy hinan. 19Pipas wasinman haykuqqa manan kutimunqachu, manañan hayk'aqpas kawsay ñanninta purinqachu. 20Chay hinaqa, allinkunaq ñanninta puriy, chaninkunaq kawsasqanta hinapuni kawsay. 21Chanin kawsaqkunaqa kay suyupin tiyanqaku, mana huchallikuqkunapas kaypin kashanqaku, 22millay runakunan ichaqa kay suyumanta wikch'usqa kanqaku, wasanchaqkunapas chaymanta t'irasqan kanqaku.

will be added

X\