Proverbios 19

1Aswan allinqa chaninta puriq wakcha runan qhelli simi rimaq mana yuyayniyoqmantaqa. 2Mana allinta reparaspa afanakuyqa manan allinchu, sinchita apurakuqqa pantanmi. 3Runaq mana yuyayniyoq-kayninqa pay kikintan waqllichin, Señor Dios contraraqtaq phiñakun. 4Qhapaqqa askha amigotan tarin, wakcha runan ichaqa amigonpa saqerparisqan rikukun. 5Llulla testigoqa muchuchisqapunin kanqa, llullakuqpas manan ayqenqachu. 6Sumaq sonqo runataqa askhan llunk'upayanku, qoykukuq runawanqa lliwllan amigota ruwanku. 7Wakcha runataqa wawqenkunapiwanpas cheqnikuntaq chayqa, amigonkunaqa astawanraqmi paymanta karunchakapunqa, valepakushanqaña chaypas manan tarinqachu. 8Allin yuyayta tariqqa pay kikintan munakun, allin yuyayta hap'iqqa allillanpunin kanqa. 9Llulla testigoqa muchuchisqapunin kanqa, llullakuqqa wañunqan. 10Mana yuyayniyoqpaqqa manan qhapaq hina kawsanan tupanchu, manallataqmi kamachi runapaqqa umalli runakunata kamachinanpas tupanchu. 11Runaq allin yuyayniyoq-kayninqa phiñakuytan hark'an, k'amiqninta hinallata qhawaqqa hatunchasqan kanqa. 12Leonpa qaparisqan hinan reypa phiñakusqanqa, reypa sumaq qhawarisqanmi ichaqa q'achu patapi sulla hina. 13Mana yuyayniyoq churiqa taytantan llakiman q'epiykun, qaparkachaq warmiqa sut'uylla-sut'uq unu hinan. 14Wasitapas qhapaq kaykunatapas tayta-mamamantan chaskinku, allin yuyayniyoq warmin ichaqa Señor Diospa qosqan. 15Qella-kayqa misk'itan puñuchikun, qella runapas yarqaytan muchun. 16Kamachisqa simita hunt'aqqa kawsaynintan waqaychan, Señor Diospa yachachikuyninta pisichaqmi ichaqa wañunqa. 17Wakcha runaman manuyqa Señor Diosman manuymi, Señor Diosmi manusqantaqa kutichipunqa. 18Churiykita wanachiy tiempo kashaqtinraq, ama wañunanta munaychu. 19Phiñakuylla-phiñakuqqa imachus chaskinantan chaskinan, yanapaykunkiña chaypas aswan mana allinmi kanqa. 20Kunaykusqata uyarikuy, wanaykuchisqatapas hap'ikuy, chay hinapin yachayniyoq kapunki. 21Imaymana yuyaykusqakunan runaq sonqonpiqa kan, ichaqa Señor Diospa yuyaykusqallanmi hunt'akun. 22Runamantaqa suyakunchis, khuyapayakuq kaynintan. Aswan allinqa wakcha runan, llulla runamantaqa. 23Señor Diosta manchakuyqa kawsanapaqmi, chay manchakuywanmi runaqa kusisqa kawsan, manan ima mana allinpas chayanchu. 24Qellaqa p'ukumanmi makinta challpuykun, manataqmi chaytaqa siminmanpas aypachinchu. 25K'ankaykachaqta hasut'iy, hinan pisi yuyayniyoqqa yuyayniyoq-kayta yachanqa, allin reparaq runata anyaykuy, yachaytan aypanqa. 26Taytanta suwaqpas, mamanta qarqoqpas, millay p'enqayta ruwaq churin. 27Churilláy, yachachikuyniykunatachus mana uyariq tukupunki chayqa, allin yachayniyoq simikunamantan karunchakapunki. 28Waqllisqa testigoqa chaninchaymantan asikun, millay runakunapaqqa mana allinkaqmi sumaq mikhuna hina. 29Soq'anakunan uma hoqariqkunapaq wakichisqa kashan, hasut'ikunataq mana yuyayniyoqkunaq wasanpaq kashan.

will be added

X\