1 Payllapaq kawsaqqa munaynillantan maskhan, llapa allin yuyaychaykunatapas manan munanchu. 2 Mana yuyayniyoqqa manan yachayta munanchu, aswanpas paypa yuyaykusqallantan willakuyta munan. 3 Pipas mana chaninta ruwaqqa pisichasqan kanqa, pipas p'enqachisqa kaqqa millay qhawasqan kanqa. 4 Runaq rimasqankunaqa chinkay-chinkay ukhu unu hinan, yachaymi ichaqa pukyumanta phawamuq ch'uya mayu hina. 5 Huchallikuqman sayakuyqa manan allinchu, chanin runapaq chaninchapuyta waqllichiypas manallataqmi allinchu. 6 Mana yuyayniyoqpa siminqa pay kikintan sasaman q'epiykun, rimasqanmantapas hasut'ichikunmi. 7 Mana yuyayniyoqpa siminqa pay kikintan chinkachin, rimasqankunawanmi pay kikinta seq'okun. 8 Simi apaq rimasqankunaqa sumaqllaña mikhuna hinan, sonqo ukhukamataqmi haykunpas. 9 Llank'anapi qellakuqqa kaqninkunata q'aruq runaq wawqenmi. 10 Señor Diosqa qaqa sayaq pukara hinan, chaymanmi chanin runaqa phawan, allin hark'aykusqataqmi kashan. 11 Qhapaq runaqa kaqninkunatan allin sayachisqa llaqtata hina qhawan, qhapaq runaqa hatunkaray perqapas kanman hinatan qhapaq kayninkunata qhawan. 12 Manaraq urmaykushaspanmi runaq sonqonqa hatunchakun, k'umuykukuq runan ichaqa hatunchasqa kanqa. 13 Manaraq allinta uyarishaspa simita kutichiqqa mana yuyayniyoqmi, mana p'enqakuqtaqmi. 14 Onqosqataqa kawsayta munasqanmi kallpachan, ichaqa, ¿pitaq kallpachanqa llakiq ñit'isqantari? 15 Reparaq runaqa yachaytan tarin, yachayniyoqqa yachayta uyariytan munan. 16 Sumaq sonqo qoykuyqa llapa punkutan kicharin, allichachaq runakunaq qayllankamataq chayachinpas. 17 Chaninmanmi rikch'akun ñawpaqta quejakuqpa rimasqanqa, awqan chayamuspataq mana hina kasqanta sut'inchan. 18 Iskay kallpasapa churanakun chayqa, sorteaspallan ch'aqwayninkutaqa ch'inyachinku. 19 Phiñachisqa wawqeman asuykuyqa aswan sasan perqawan muyuchisqa llaqtaman haykuymantaqa, wawqekunaq churanakusqanqa wisq'asqa punkuyoq pukara hinan. 20 Runaqa rimasqanwanmi imaynapas kapunqa, rimasqanmantan chaskinqa. 21 Simiqa atinmi wañuchiytapas kawsachiytapas, chaymi runaqa rimasqanmanta imaynaña kaqtinpas chaskinqa. 22 Allin warmiwan casarakuqqa allinkaqtan tarin, Señor Diospa allin qhawarisqantaqmi kanpas. 23 Wakcha runaqa valekuspan riman, qhapaqtaqmi k'arak simikunawan kutichin. 24 Kanmi waqllichiq amigokuna, kallantaqmi wawqemantapas aswan munakuq amigo.
