Proverbios 17

1Ch'aqwaykunaq kasqan wasipi askha mikhunamantaqa aswan allinmi sumaq kawsaypa kasqan wasipi huk khamuykuy ch'aki t'anta. 2Allin yuyayniyoq kamachiqa mana p'enqakuq churitan kamachinqa, wawqenkunawantaqmi herenciata chaskinqa. 3Crisolpin qolqetaqa ch'uyayachinku, hornopin qoritaqa ch'uyayachinku, Señor Diostaqmi sonqokunata pruebaqqa. 4Millay runaqa mana chanin rimasqatan uyarin, llullaqa millay simitan uyarin. 5Wakcha runata asipayaqqa Kamaqnintan asipayan, muchuqmanta kusikuqqa muchuchisqapunin kanqa. 6Yuyaq runakunaq coronanqa nietokunan, wawakunaq kusikunanqa tayta-mamakunan. 7Mana yuyayniyoqpaqqa manan allinchu yachaysapa simikunata rimayqa, kamachikuqpaqpas manallataqmi allinchu llullakuyta rimayqa. 8Lluk'iykuyta yachaqpaqqa khuya rumi hinan lluk'iykuyqa, maymanña rin chaypas payqa allillanpunin. 9Huchallikuyta pampachaqqa munakuytan t'ikarichin, huchallikusqata willarqariqmi ichaqa amigokunata t'aqanachin. 10Allin reparaq runaqa huk anyaykusqallawanmi astawan yachaqan pachak maki hasut'iwan mana yuyayniyoqpa yachaqasqanmantaqa. 11Millay runaqa contra hatariyllatapunin munan, ichaqa sinchi muchuchiq runatan payman kachanqaku. 12Aswan allinqa uñankuna qechusqa china ukumariwan tupaymi, mana yuyayniyoq millaykunata ruwashaq runawan tupaymantaqa. 13Runachus allinmanta mana allinwan kutichin chayqa, wasinpiqa sasachakuy kashallanqapunin. 14Ch'aqwata hatarichiqqa qocharayaq unuta kacharpariq hinan, chayrayku ch'aqwa manaraq qallarishaqtin churanakuyta saqepuy. 15Huchallikuqta mana huchayoqman tukuchiytapas, chanin runata huchachaytapas Señor Diosqa millakunmi. 16Mana yuyayniyoqri, ¿imapaqtaq qolqeta apamun yachayta rantinanpaq, mana yuyaynin kashaqtinri? 17Tukuy tiempon amigoqa munakun, llaki-phutiy tiempopipas wawqe hinan khuyapayakun. 18Mana yuyayniyoq runaqa fiakunanpaqmi prometekun, hinaspan wasimasinpaq fiakun. 19Ch'aqwayta munaqqa huchallikuytan munan, alabakuqqa waqlliynintan maskhan. 20Millay sonqoyoqqa manan hayk'aqpas allinkaqta tarinchu, llullakuqpas mana allinmanmi urmaykun. 21Mana yuyayniyoq churiqa taytantan llakichin, mana yuyayniyoq runaq taytanqa manan kusikunchu. 22Kusisqa sonqoqa allin hampin, llakisqa sonqon ichaqa onqochin. 23Millay runaqa pakapi lluk'iykusqatan chaskikun chaninchayta waqllichinanpaq. 24Yuyayniyoqqa yachayllawanpunin ruwayta munan, mana yuyayniyoqmi ichaqa imaymanaman chapukun. 25Mana yuyayniyoq churiqa taytantan llakichin, mamantapas waqapachin. 26Manan allinchu chanin runata muchuchiyqa, manallataqmi allinchu allichachaq runakunata hasut'iypas chanin kawsayniyoq kasqankumantaqa. 27Takyasqa runaqa tupusqallatan riman, allin reparaqqa samp'a sonqollan. 28Mana yuyayniyoq upallakuqtinqa, yachayniyoqpaq hap'isqan kanqa, upallakuqqa yuyayniyoqpaq hap'isqan kanqa.

will be added

X\