Proverbios 16

1Runaqa sonqonpin imatapas yuyaykun, Señor Diosmi ichaqa: “Arí”, ninpas, “manan”, ninpas. 2Runapaqqa tukuy ruwasqanpas ch'uyamanmi rikch'akun, Señor Diostaqmi yuyaykusqankunata juzgan. 3Lliw ruwanaykikunata Señor Diosman hap'iykachiy, hinan yuyaykusqaykikuna hunt'akunqa. 4Señor Diosqa tukuy imatapas huk yuyaywanmi ruwarqan, millay runatawanpas muchuchina p'unchaypaqmi ruwarqan. 5Señor Diosqa millakunmi llapan hatunchakuq sonqoyoqtaqa, paykunaqa huchachasqapunin kanqaku. 6Munakuywan cheqaq-kaywanmi huchaqa pampachakun. Señor Diosta manchakuspan runaqa mana allinmanta t'aqakun. 7Señor Diosqa runaq allin kawsasqanwan kusikun chayqa, awqankunawanpas paytaqa sumaqtan kawsachinqa. 8Aswan allinqa chaninninpi pisilla tarisqan, mana chaninninpi askhata tarisqamantaqa. 9Runaqa sonqonpin imachus ruwananta yuyaykun, Señor Diostaqmi imayna kanantaqa unanchan. 10Reyqa Diospa rimachisqantan riman, juzgaspanqa chaninninpin rimarin. 11Señor Diosmi munan chanin balanzatapas chanin romanakunatapas, payqa llapa pesakunatan qhawan. 12Reykunaqa millakunmi mana chanin ruwasqakunata, chanin ruwaywanmi reypa kamachikuyninqa allinta sayan. 13Chanin rimasqakunawanmi reykunaqa kusikunku, paykunaqa cheqaqkaq rimaqtan munakunku. 14Reypa k'arak phiñakuyninqa wañuymanta willakuq hinan, yachayniyoq runan ichaqa chay phiñakuyta thasnun. 15Reyta kusisqa uyantinta rikuqqa kawsanqan, sumaq qhawarimuyninqa poqoypi para phuyu hinan. 16Aswan allinqa yachayta tariymi qori tariymantaqa, aswan allinqa yuyayta akllakuymi qolqe akllakuymantaqa. 17Chanintapuni kawsaqqa mana allinmantan t'aqakun, imayna kawsasqanta qhawakuqqa pay kikintan waqaychakun. 18Uma hoqariqqa qhepamanmi waqllinqa, anchaykachaq sonqoqa qhepamanmi urmanqa. 19Aswan allinqa wakchakunawan k'umuykukuymi qechusqakunata uma hoqariqkunawan rakinakuymantaqa. 20Yachachikuyta maki uyariqqa allinyanqan, Señor Diosman hap'ipaykukuqqa kusisamiyoqmi. 21Takyasqa yuyayniyoqqa “allin tanteaq” nisqan, misk'i simiqa yachayniyoq kaytan yapaykun. 22Allin yuyayniyoq-kayqa yuyayniyoqkunatan kawsarichin, mana yuyayniyoq-kaytaq mana yuyayniyoqkunata muchuchin. 23Yachayniyoqqa allin chayasqatan riman, rimasqankunaqa aswantan creechin. 24Sumaq rimasqakunaqa miel misk'i hinan, simipaqmi misk'i, cuerpopaqmi hampi. 25Runapaqqa kanmi cheqanman rikch'akuq ñan, p'uchukayninmi ichaqa wañuna ñan. 26Mikhunayachikuqqa allintan llank'an yarqay payta qatirisqanrayku. 27Millay runaqa waqllisqakunatan yuyaykun, siminpas qallushaq nina hinan. 28Waqllisqa runaqa ch'aqwatan hatarichin, simi apataq ancha munanasqa amigokunata t'aqanachin. 29Maqakuq runaqa runamasintan q'otun, mana allin ñannintataq pusanpas. 30Pipas waqllisqakunata ruwananpaq yuyaykuqqa ñawintan q'esuykun, pipas mana allinkuna ruwayta yuyaykuqqa simintan q'estichin. 31Unayta kawsayqa chanin runakunaq premionmi, soqoyoq kayqa umatan munaychan. 32Kallpasapamanta aswan allinqa mana usqhay phiñakuqmi, huk llaqta hap'iqmanta aswan allinqa pay kikinta cuidakuqmi. 33Diospa munayninta yachanapaqqa sorteankun, Señor Diostaqmi tukuyta sut'inchan.

will be added

X\